«2018թ․-ի Դուշանբեի քննարկումների ժամանակ, որոնք ստացան վերելակային բանակցություններ անունը, ի՞նչ էր տեղի ունենում Արցախի առաջնագծում։ Կողմերն առաջնագծում պետք է հնարավորինս նվազեցնեին կրակոցներն ու փոխհրաձգությունը։ Այդ ժամանակ իսկապես ունեցանք հրադադարի ռեժիմի խախտումների էական նվազում, մարդկային կորուստների թվի էական նվազում, ինչը ձեր ղեկավարին առիթ տվեց խոսելու, որ գործընթացը կառուցողական է։ Ձեր ղեկավարն ասաց, որ Ալիեւը կիրթ, կառուցողական բանակցողի տպավորություն է թողնում»,-ԱԺ լիագումար նիստում այսօր դիմելով իշխանությանը՝ ասաց «Պատիվ ունեմ» դաշինքի պատգամավոր Տիգրան Աբրահամյանը։
Նա շեշտեց․ «Բայց իրականում առաջնագծում լրիվ այլ բան էր տեղի ունենում։ Այն հատվածներում, որտեղ մինչեւ այդ Ադրբեջանը հնարավորություն չուներ ենթակառուցվածքներ, պաշտպանության եւ հակահարձակման հնարավորություններ ստեղծելու, օգտվեց դիվանագիտական փուչիկից, ստեղծեց հնարավորություններ, որոնք հետո՝ 2020թ․-ի պատերազմի համար ապահովեցին մեկնարկային առավելություններ»։
Լուիզա ՍՈՒՔԻԱՍՅԱՆ
