Երեկ Վանաձորում տեղի ունեցած հորդառատ անձրեւների հետեւանքով առաջացած հեղեղները անանցանելի էին դարձել Մ6 միջպետական ճանապարհի Վանաձորի Նարեկացի փողոցի որոշ հատվածներ:
Սելավաջրերը լցվել էին շենքերի բակեր, ավտոտնակներ ու նկուղներ: Նարեկացի փողոցի բնակիչները նշում են, որ ամբողջ գիշեր չեն քնել՝ զբաղվել են բնակարաններն ու նկուղները ցեխաջրից մաքրելով. «Գարաժն էլա ջուր լցվել, պադվալներն էլ: Գիշերը մինչեւ ժամը 12-ը, նասոսները դրած պադվալներից ջուր էինք հանում», ասում է բնակիչներից Սեյրան Եգանյանը:
Բնակչուհիներից Սոֆիա Արոյանն էլ նշում է, որ ամեն անգամ անձրեւից հետո, նույն իրավիճակն է ստեղծվում: Միաժամանակ նաեւ փորձում է լուծում առաջարկել. «Ըստ մեզ, լուծումն այն է, որ վերեւի հատվածում պատ դնեն, որ էդ ջրի հոսքը փոխեն: Թե չէ ամեն անձրեւից հետո էս վիճակն է: Արդեն քանի անգամ իրար վրա կրկնվումա: Ահավոր էր, փողոցի կողմը լրիվ ոնց որ գետ հոսեր»:
Կարդացեք նաև
Սելավաջրերը լցվել են 7 շենք ու 13 առանձնատուն: Այս պահին հաշվվում են պատճառված վնասի չափը. «Պետք է կարողանանք պատնեշենք, մարգեր ստեղծենք, որպեսզի ջրի հեղհեղուկների թափանցումը միանգամից չգա դեպի քաղաք: Մեծ լուծումներ են պահանջում, այս պահին լոկալ լուծումներ տվել ենք, բայց դրանք բավարար չեն, որպեսզի հետագայում չկրկնվեն»,-տեղեկացրեց Վանաձորի քաղաքապետ Մամիկոն Ասլանյանը:
Տաթեւիկ ՂԱԶԱՐՅԱՆ
