ԱԺ լիագումար նիստում այսօր «Հայաստան» դաշինքն ԱԺ տնտեսական հարցերի մշտական հանձնաժողովի նախագահի պաշտոնում առաջադրեց իրենց խմբակցության անդամ, Սյունիքի նախկին մարզպետ Վահե Հակոբյանի թեկնածությունը։
Դաշինքի քարտուղար Արծվիկ Մինասյանի կողմից նրա կենսագրության ներկայացումից հետո ԱԺ փոխնախագահ Ռուբեն Ռուբինյանը հետաքրքրվեց․ «Հաշվի առնելով պարոն Հակոբյանի կապը Զանգեզուրի պղնձամոլիբդենային կոմբինատի հետ՝ չեք կարծո՞ւմ, որ տնտեսական հարցերի հանձնաժողովի նախագահ լինելու դեպքում շահերի բախման որոշակի ռիսկ կառաջանա»։
Հիշեցնենք, որ Վահե Հակոբյանը վերջերս դադարել է հանդիսանալ կոմբինատի խորհրդի անդամ։
Արծվիկ Մինասյանն արձագանքեց, որ ԱԺ կանոնակարգ օրենքը հստակ կարգավորումներ է նախատեսում՝ շահերի բախման դեպքում․ «Եթե որեւէ կերպ նման ռիսկեր առաջանան, կանոնակարգումը կա»։
Կարդացեք նաև
Ռուբինյանը նաեւ հարցրեց՝ ըստ ձեզ, Վահե Հակոբյանը պե՞տք է մասնակցի մի քննարկման, որը կարող է առնչվել ԶՊՄԿ-ին։ Մինասյանը պատասխանեց․ «Եթե օրենսդրական նախագիծը վերաբերի մեկ կառույցի գործունեության, ըստ կանոնակարգի՝ անձն իրավունք չունի մասնակցել քվեարկությանը եւ պարտավոր է հայտարարել շահերի բախման մասին»։
Լուիզա ՍՈՒՔԻԱՍՅԱՆ
