Եթե ոչ այսօր, ապա վաղը «Հայաստան» դաշինքի անդամ Սյունիքի կալանավորված համայնքապետերի հարցով ՍԴ դիմում է ներկայացվելու: Այս մասին այսօր խորհրդարանում լրագրողների հետ զրույցում ասաց «Հայաստան» խմբակցության պատգամավոր Արամ Վարդեւանյանը:
«Դիմումն արդեն իսկ պատրաստ է`պատգամավորի անձեռնմխելիության վերաբերյալ: Ի լուր դատախազության` նաեւ մի հետաքրքիր բան ասեմ, որը այդ ամենից տեղյակ լինելով հանդերձ, ցավալիորեն չէր արձագանքել. հուլիսի 20-ին, ներկայացվել էր դիմում`պատգամավորներից մեկի նկատմամբ, ով որ դեռ, իհարկե, լիազորությունները չէր ստանձնել, քրեական հետապնդում սկսելու վերաբերյալ: ԿԸՀ-ն վերադարձրել է այդ միջնորդությունը`հիմքով, որ այլեւս պատգամավորի թեկնածուի կարգավիճակ առկա չէ եւ այդ հարցի լուծումը դուրս է ԿԸՀ իրավասությունից: Բայց ՀՀ դատախազության համար այս պարզ ճշմարտությունը` ԿԸՀ-ի արձանագրած կարգավիճակների փոփոխությունը, դեռ հասկանալի չէ»,- ասաց Արամ Վարդեւանյանը: Փաստորեն, ըստ Արամ Վարդեւանյանի, այդպիսով հնարավոր չէր հաղթահարված համարել անձեռնմխելիությունը:
«Սա իրավական աբսուրդի բարձունքներից մեկն է, որը, կարծում եմ, դեռ երկար ժամանակ, որեւէ պաշտոնյա չի կարող հաղթահարել»,- ասաց Արամ Վարդեւանյանը`հավելելով, որ առնվազն վստահ է, որ Սյունիքի համայնքապետերի կալանավորումները վերացվելու են, նրանք լինելու են ազատության մեջ, ինքը ոչ մի վայրկյան չի կասկածում եւ իրավական այս ամենաթողությունն էլ իր ավարտն ունենալու է:
Կարդացեք նաև
Նելլի ԳՐԻԳՈՐՅԱՆ
