«Քաղաքացիական պայմանագիր» խմբակցությունն ԱԺ լիագումար նիստում այսօր պետաիրավական հարցերի մշտական հանձնաժողովի նախագահի պաշտոնում առաջադրեց իրավաբանական գիտությունների թեկնածու Վլադիմիր Վարդանյանին։
Հիշեցնենք, որ նախորդ՝ 7-րդ գումարման ԱԺ-ում նա զբաղեցնում էր նույն հանձնաժողովի նախագահի պաշտոնը։
Ելույթի ժամանակ Վարդանյանը շեշտեց՝ ՔՊ-ից առաջադրումը մեծ պատիվ է եւ պատասխանատվություն, ապա խոսեց արդյունքներից։ «Հանձնաժողովը 2019թ․-ից քննադատվել է դատավորների «վեթինգ» չիրականացնելու համար, ոչ հստակ եւ ոչ արդյունավետ աշխատանքի համար։ Իհարկե, հասկանում ենք հիմա, որ աշխատանքներն արվել են այնպես, ինչպես պետք է ընթանային, բայց հիշենք, որ այդ թվականին դատաիրավական բարեփոխումների վերաբերյալ հանրության պահանջմունքը ծայրահեղ հակասական էր։ Հանրության մի մասը պահանջում էր անմիջապես վերացնել դատական համակարգը եւ բոլորին պաշտոնանկ անել, մյուս մասն էլ ասում էր, որ դատական համակարգում չկա խնդիր եւ դատական իշխանությունը դիտարկում որպես ապաքաղաքական իշխանություն։ Այս երկու հատվածներն այն ծայրահեղություններն էին, որոնք անընդունելի էին մեր համար։ Դրա համար հանձնաժողովը, արդարադատության նախարարությունը եւ կառավարությունը կարեւորեցին ոչ թե բարեվարքության մեկանգամյա ստուգումը, այլ առօրյա ռեժիմում բարեվարքության ստուգման տարբերակը։ Գործող եւ գործելիք կարգավորումները հնարավորություն կտան «առցանց» ռեժիմում վերհանել դատավորի անթույլատրելի վարքագիծը եւ հետեւություններ անել դրանից։ Գործընթացը սահմանափակված չէ ժամանակով եւ անձանցով։ Դատական իշխանությունում բարեփոխումները կրելու են անընդհատ բնույթ»,-վստահեցրեց Վլադիմիր Վարդանյանը։
Նա գործընկերներին համագործակցության կոչ արեց՝ հանուն քաղաքացու եւ ապագայի։
Կարդացեք նաև
Հավելենք, որ «Հայաստան» դաշինքն էլ տնտեսական հարցերի մշտական հանձնաժողովի նախագահի պաշտոնում առաջադրեց Սյունիքի նախկին մարզպետ Վահե Հակոբյանի թեկնածությունը։
Լուիզա ՍՈՒՔԻԱՍՅԱՆ
