«Դեկտեմբեր ամսին բոլոր կանխատեսումներն ասում էին, որ Հայաստանը 2021 թվականին կունենա 1-1.5% տնտեսական աճ, բայց արդյունքում, մենք 1-ին կիսամյակում ունենք 5% տնտեսական աճ ու ամեն ինչ գնում է նրան, որ մենք կունենանք 10%-ից ավելի տնտեսական աճ»,-այս մասին այսօր կառավարության նիստից հետո լրագրողների հետ ճեպազրույցում ասաց էկոնոմիկայի նախարար Վահան Քերոբյանը, պատասխանելով հարցին՝ Նիկոլ Փաշինյանի՝ տարիներ առաջ հայտարարած «կախարդական փայտիկի» ազդեցությունը ո՞րն է։ Նախարարը որպես արդյունք նշեց կոռուպցիայի արմատախիլ անելը․«Ես չեմ ասում, որ չկա կոռուպցիա, կա ինչ-որ չափով, բայց դա համակարգային չէ եւ կոռումպացված մարդիկ հաճախ հայտնվում են ճաղերի հետեւում»:
Ապա նա նշեց՝ տնտեսության անդրադարձը այդպիսի խորը կրկնակի ճգնաժամից արդյունքն է նաեւ նրա, որ այդ «կախարդական փայտիկը» գործում է, տնտեսությունն արյունաքամ չի լինում կոռումպացված գումարներով, այսինքն` տնտեսությունից դուրս չեն գալիս այն գումարները, որոնք առաջ սեւ ճանապարհներով դուրս էին գալիս։
Անդրադառնալով գնաճին, նախարարն ասաց, որ դա պայմանավորված է միջազգային շուկայում մի շարք ապրանքատեսակների, որոնք ներմուծում ենք, գնաճով՝ բենզինի, ցորենի, շաքարավազի․«Օգոստոսից սկսվում է հիմնական ապրանքատեսակների նոր բերքի մասին նոր տեղեկատվությունը, եւ վստահ եմ՝ գների էական անկում կլինի»։
Կարդացեք նաև
Նելլի ԲԱԲԱՅԱՆ
