ՔՊ պատգամավոր, տավուշցի Վահե Ղալումյանն այսօր ԱԺ-ում լրագրողների հետ զրույցում ասաց, որ Ոսկեպարում ռուս սահմանապահների տեղակայման, ուղեկալների մասին որեւէ տեղեկություն չունի, այսօր կպարզի:
Հարցին՝ որեւէ բնակավայր հանձնելու հարց դրվա՞ծ է, նա հերքեց, իսկ երբ հիշեցրին, որ ժամանակին ասել էր՝ Տավուշում անկլավներ կան՝ Ղալումյանն արձագանքեց. «Ես ասել եմ, որ Տավուշում կան հողեր, որ գտնվում են Ադրբեջանի վերահսկողության տակ եւ կան ադրբեջանական հողեր, որ գտնվում են մեր տիրապետության տակ»: Հարցին՝ հնարավո՞ր է դրանք փոխանակել՝ Ղալումյանը պատասխանեց. «Չեմ բացառում: Ես գտնում եմ, որ կա խնդիր եւ պետք է նստել, խոսել»:
Իսկ թե Տավուշում ի՞նչ խնդիր կա, որ ռուս սահմանապահների տեղակայման անհրաժեշտություն է առաջացել՝ Վահե Ղալումյանը պատասխանեց. «Այս պահին Տավուշում ոչ մի խնդիր չկա»: Պատգամավորն ասաց, որ ժամանակ չի ունեցել մանրամասն հետաքրքրվել. «Ինչքան գիտեմ, փաստաթուղթ կա, որ սահմանազատման, սահմանագծման հանձնաժողով ստեղծվի, սահմանում գոյություն ունեցող խոչընդոտները հարթեն»:
Լրագրողները նաեւ հարցրեցին՝ Նիկոլ Փաշինյանը հայտարարում էլ, որ ՀԱՊԿ-ից պետք է հայ-ադրբեջանական սահմանին ուժեր տեղակայվեն, դուք դրան ո՞նց եք վերաբերվում, փաստորեն, մեր սահմանների հսկողությունն ամբողջությամբ այլ երկրներին է հանձնվում՝ Ղալումյանը պատասխանեց. «Մենք ունենք պայմանագիր ու սահմանների հետ կապված խնդիրների դեպքում պարտավոր են միջամտել՝ ըստ պայմանագրերի»:
Կարդացեք նաև
Հարցին՝ այսինքն, դուք կո՞ղմ եք, որ մեր սահմանին ռուս կամ ՀԱՊԿ-ի սահմանապահ զորքեր տեղակայվեն՝ նա պատասխանեց. «Ես կողմ եմ խաղաղությանը եւ եթե այդ խաղաղությանը պետք է հասնել այդ ճանապարհով, կարելի է այդ ճանապարհով»:
Հռիփսիմե ՋԵԲԵՋՅԱՆ
