Կառավարության այսօրվա նիստում առողջապահության նախարար Անահիտ Ավանեսյանը ներկայացնելով կորոնավիրուսի համավարակի իրավիճակն՝ ասաց, որ երեկ կատարվել է 6492 թեստավորում, որից հաստատվել է կորոնավիրուսային հիվանդության 303 նոր դեպք, գրանցվել է մահվան 4 դեպք, 208 առողջացած:
Ըստ նախարարի, ավելացել են թեստավորման ծավալները, դրական դեպքերի թիվը դանդաղ, բայց աճում է․ «Մենք նորից փորձում ենք ուժեղացնել, հորդորել, ուշադրությունը սեւեռել փակ տարածքներում կանոնների պահպանման ռեժիմին, ուսումնական նոր տարվա մեկնարկն է սկսվելու եւ ամեն բան պետք է անենք կանոնները պահպանելով՝ հնարավորինս զսպել աճը»։
Նա կրկին քաղաքացիներին հորդորեց պատվաստվել, քանի որ դա վարակի տարածման կանխարգելման միջոց է։
Անդրադառնալով պատվաստումների ծավալին, նախարարն ասաց՝ ընդհանուր 190 հազար 36 պատվաստում է իրականացվել, որից միայն երեկ՝ 6188 պատվաստում։
Կարդացեք նաև
Անցած շաբաթ սեկվենավորվել են շրջանառվող շտամերը եւ 30 նմուշառված դեպքերից արձանագրվել է դելտա շտամի 25 դեպք, 5-ը՝ բրիտանական շտամ։
«Հորդորում ենք զգոն լինել, այս շտամը տարածելիության բարձր մակարդակ ունի, ինչը բերում է հիվանդացության աճի։ Պետք է հնարավորինս խուսափել, ցավոք սրտի, տարածաշրջանում գրանցվող հոսպիտալացման մեծ դժվարություններից»,-ասաց նախարարը։
Հուլիսի 15-ից վարվում է պատվաստումների առանձին վիճակագրություն, այդ օրվանից մինչեւ օգոստոսի 4-ը պատվաստվել է 58108 անձ, որից 56010-ը ՀՀ քաղաքացիներ են, 2096-ը՝ օտարերկրացիներ։
Նելլի ԲԱԲԱՅԱՆ
