Ինչպես հայտնել էիք, «Հայաստան» դաշինքից ԱԺ փոխնախագահի պաշտոնում առաջադրված թեկնածու Իշխան Սաղաթելյանը երկրորդ անգամ չընտրվեց, ինչից հետո իշխանությունն առաջարկեց, որ միայն իրենք մասնակցեն քվեարկությանը, ապահովեն նվազագույն ձայներ, ընդդիմությունն էլ չհամաձայնեց՝ պնդելով, որ այդպես իշխանությունն ուզում է ցույց տալ, թե իրականում ընդդիմությունից են եղել պատգամավորներ, որոնք չեն քվեարկել կամ դիտավորյալ անվավեր են դարձրել քվեաթերթիկը։
«Հայաստան» դաշինքից Գեղամ Նազարյանը վրդովված ելույթ ունեցավ, դիմեց ՔՊ-ին ու համոզմունք հայտնեց, որ ՔՊ-ն այսպես մտադիր է հանրությանը ցույց տալ, թե ընդդիմությունը միասնական չէ։ «Եռաբլուրում շարունակվում են հուղարկավորությունները, իսկ դուք այստեղ նման խաղով խաբում եք հանրությանը, թե դուք լավն եք, իսկ ընդդիմությունը՝ վատը։ Ժողովրդի հաշվին մի արեք նման բան։ Ժողովրդի փողի հաշվին մի ասեք, թե մենք մեկ բացակա պատգամավոր ունենք։ Ճիշտ է, որ ստերով խաբել եք մարդկանց ու ձայներ ստացել, բայց ժողովուրդն իմաստուն է։ Խաբեցիք, թե երեսուն տարի առաջ Արցախն արդեն վաճառել են ու խեղճ հարիֆի ջեբը պատերազմ գցել․․․նույն եղանակով էլ այստեղ եք շարունակում։ Չի անցնելու։ Ուզո՞ւմ եք ընտրել՝ ընտրել, չէ, ուրեմն՝ չէ։ Կամ քվեարկեք, կամ պարզ ասեք, որ համաձայն չեք Իշխան Սաղաթելյանի թեկնածությանը։ Եթե նման «պրիմիտիվ» խաղեր եք այստեղ խաղում, բա կառավարությունո՞ւմ ինչեր եք անելու․․․բա Սյունիքի բարձունքները ո՞նց եք պաշտպանելու, բա Արցախի խնդի՞րը ոնց եք լուծելու։ Մանկապարտեզային խաղերո՞վ եք տնտեսություն վերականգնելու։
Այն տղաները, որ սահմանին զոհվում էին, մեծապես թքած ունեին, թե մենք ինչ քաղաքական հայացքներ ունենք, նրանք հայրենիքն իրենց կյանքով էին պաշտպանում եւ ոչ նրա համար, որ մենք այսօր այստեղ տունտունիկ խաղանք»։
Լուիզա ՍՈՒՔԻԱՍՅԱՆ
