«Պատիվ ունեմ» խմբակցության երիտասարդ գործընկերներից մեկին անդրադառնամ։ Գիտեք, երեխաները, պատանիներն ու ոչ պատանիները երազում են մեծանալ ու դառնալ տիեզերագնաց, օդաչու, բժիշկ․․․բայց այս տղան երազել ու երազում է մեծանալ եւ դառնալ Արմեն Աշոտյան»,-ԱԺ ամբիոնից այսօր հայտարարեց «Քաղաքացիական պայմանագրի» պատգամավոր Գեւորգ Պապոյանը։
Այս խոսքերի վրա «Պատիվ ունեմ»-ի նորընտիր պատգամավոր, ՀՀԿ անդամ Հայկ Մամիջանյանը տեղից նստած ծիծաղեց։
Պապոյանը շարունակեց․ «Ինչեւէ, փոքրիկ Աշոտյանի երազանքը եւս երազանք է, որն իրավունք ունի լինելու, ինչպես մյուս պատանիների երազանքները»։
Կարդացեք նաև
Ավելի ուշ Հայկ Մամիջանյանը ելույթում Պապոյանին նախ կոչ արեց իր մասին խոսելիս դիմել անվանական, դա վախենալու չի․ «Վստահ եմ, որ դուք ՀՀԿ-ի կրծքանշանն ու «դուխով» կեպկան մի տեղ իրար կողք եք պահել, որ երբ ժամանակը գա, ՀՀԿ-ինը հետ հագնեք, որը մենք ձեզ թույլ չենք տա․․․բայց անվանական դիմեք, խնդիր չկա։ Այո, ՀՀԿ-ն ունի հոյակապ կադրային ներուժ, իսկ պարոն Աշոտյանը մտնում է դրա մեջ։ Պարոն Պապոյան, ժամանակին դուք ՀՊՏՀ-ում հերթ էիք կանգնած, որպեսզի սեղմեք պարոն Աշոտյանի ձեռքը։ Լուսանկարներ կան, թե դուք ինչ հպարտությամբ եք կրում ՀՀԿ-ի նշանը։ Պարոն Պապոյան, բա դուք ի՞նչ եք ուզում դառնալ։ Ժամանակին դուք երազել եք դառնալ ՀՀԿ պատգամավոր, չի ստացվել, որովհետեւ դժվար մրցակցություն կա, փոխարենը հեշտ պատգամավոր դարձաք ՔՊ-ով։ Դահլիճում, որքան գիտեմ, բացի պրոֆեսոր Արմեն Չարչյանից, այլ բժիշկներ էլ կան։ Իրենք կհաստատեն, որ երազախաբությունը բուժվող հիվանդություն է, պարոն Պապոյան»։
Լուիզա ՍՈՒՔԻԱՍՅԱՆ
