ՄՕԿ-ը Տոկիոյի օլիմպիական խաղերի մեկնարկից բառացիորեն մի քանի օր առաջ պաշտոնապես հաստատեց օլիմպիական խաղերի նոր կարգախոս՝ «Ավելի արագ, ավելի բարձր, ավելի ուժեղ» շուրջ 130 տարվա գաղափարին տալով, ըստ էության, նոր իմաստ: Ավելացվել է «միասին» բառը, եւ օլիմպիական խաղերի կարգախոսը այսուհետեւ հնչելու է այսպես. «Ավելի արագ, ավելի բարձր, ավելի ուժեղ՝ միասին»:
Թվում է՝ ամեն բան նորմալ է եւ առանձնապես ոչինչ էլ չի փոխվել: Սակայն շատերն են տարակուսած, թե այս նոր կարգախոսի հեղինակները եւ դրա օգտին քվեարկած մարդիկ ինչո՞ւ հստակ չեն պատասխանում հարցին, թե միասին ասելով ի՞նչ կամ ո՞ւմ նկատի ունեն: Եթե երկրների միասնականությունը, մաշկի գույնը, ապա միահյուսված հինգ օղակները իրենց գույներով հենց դա են խորհրդանշում եւ օլիմպիական խաղերը ռասայական տարբերության հետ կապված անհանգստացնող խնդիրներ չեն ունեցել: Նույնը սեռերի իրավահավասարության իմաստով:
Օլիմպիական խաղերը դեռ հնագույն ժամանակներից նշանակել են խաղաղություն, սեր, միասնականություն, համերաշխություն, հանդուրժողականություն, հավասարություն, իսկ «Ավելի արագ, ավելի բարձր, ավելի ուժեղ» բառերը խորհրդանշել են մարզական խաղաղ մրցակցությունը հավասարների միջեւ: Հետեւաբար, ի՞նչը կարող է լինել «միասին» բառը մեջտեղ բերելու իմաստը եւ պատճառը:
Ավելի քան 100-ամյա խորհրդանիշ-կարգախոսը օլիմպիական խաղերի անբաժանելի մասն է ճիշտ այնպես, ինչպես հինգ օղակները, օլիմպիական դրոշը, օլիմպիական օրհներգը, օլիմպիական երդումը եւ օլիմպիական կրակը, որ անպայման վառվում է Հունաստանում: Ուրեմն, ի՞նչ անհրաժեշտություն կար աղավաղել մեկ դարից ավելի կյանք ունեցող ավանդույթը, որը բավարարում էր բոլորին:
Կարդացեք նաև
Աշոտ ՀԱԿՈԲՅԱՆ
