ԱԺ լիագումար նիստում այսօր «Հայաստան» դաշինքի անդամ Գեղամ Մանուկյանը, դիմելով իրենց խմբակցության ղեկավար Սեյրան Օհանյանին, խնդրեց պարզաբանել՝ իշխանության քարոզչական թեզերից մեկն այն է, որ սահմանի ամրապնդման, ինժեներական աշխատանքների կատարման տեսանկյունից վերջին երեք տարում ավելի շատ բան է արվել, քան նախորդ 20 եւ ավել տարիներին, այդպե՞ս է։
Սեյրան Օհանյանը շեշտեց, որ ինժեներական ամրակայման աշխատանքները շարունակվել են նաեւ 2018թ․-ից հետո, սակայն համեմատությունն անընդունելի է։
Որպես օրինակ պաշտպանության նախկին նախարարը հետեւյալ դեպքը պատմեց․ «Այն ժամանակվա ընդդիմադիր գործիչ Նիկոլ Փաշինյանը, երբ ապրիլյան պատերազմից հետո ինձ մոտ էր, աշխատասենյակումս հարցրեց՝ ինչպե՞ս է ստացվել, որ ապրիլյանից հետո ավելի շատ աշխատանք է կատարվել, քան նախկին տարիներին․․․ես սեղմել եմ կոճակը, կապվել բանակի հրամանատարի հետ ու հարցրել՝ քանի՞ կմ հակատանկային փոս ունես։ Պատասխանեց, որ 483։ Հարցրի, թե քանիսն է հիմա կառուցել։ Ասաց՝ 6,7 տասնորդական կմ։ Հետեւաբար, այդ ինչպե՞ս է ստացվել, որ նախկինում ավելի քիչ էր, քան հիմա»։
Լուիզա ՍՈՒՔԻԱՍՅԱՆ
