«Ընթացիկ իրողությունները հուսահատվելու հիմք չեն տալիս։ Մանավանդ, որ մենք այդ իրավունքը չունենք։ Այո, մեզ չհաջողվեց ամբողջական իշխանափոխություն իրականացնել, բայց իրավունք չունենք չգնահատելու այն իրողությունը, որ մենք կարողացանք ճեղքել երկրում հաստատված քաղաքական մենաշնորհը եւ խորհրդարանում ունենալ ներշնչող թվով ընդդիմադիր խմբակցություն»,-ԱԺ լիագումար նիստում այսօր հայտարարեց «Հայաստան» խմբակցության ղեկավար Սեյրան Օհանյանը։
Նա նշեց․ «Մեր քաղաքական օրակարգը եւ նպատակադրումները սպառված չեն։ Մենք քաղաքական պատասխանատվության լրջագույն պարտք ունենք մեր 270 000 ընտրողների առաջ։ Իրականում պատասխանատվությունն ավելի մեծ է։ Մենք պատասխանատու ենք մեր հայրենիքի եւ այն քաղաքացիների համար, որոնց հուսահատությունը թույլ չտվեց գնալ ընտրությունների։ Պատասխանատվությունը մեզ պարտավորեցնում է չդադարեցնել պայքարը եւ խորհրդարանական ու արտախորհրդարանական պայքարի ողջ գործիքակազմը ծառայեցնել դրան»։
Լուիզա ՍՈՒՔԻԱՍՅԱՆ
