Արդյոք պղնձի եւ մոլիբդենի միջազգային բարձր գների ազդեցությունը ՀՀ ընդհանուր մակրոտնտեսական պատկերի վրա շարունակում է դրական մնալ, եւ հանքահումքային ապրանքների լրացուցիչ հարկումն ինչպես կազդի տնտեսության վրա։ Այսօր լրագրողների հետ հանդիպմանը պատասխանելով այս հարցին, կենտրոնական բանկի նախագահ Մարտին Գալստյանն ասաց՝ ընդհանրապես, ազդեցությունները կարող են բազմապիսի լինել՝ կախված նրանից, թե կառավարությունը հավելյալ հավաքագրված հարկային միջոցներն ինչ ճանապարհով կվերադարձնի տնտեսություն՝ դրանք կուղղի ընթացիկ ծախսերի՞ն, թե՞ կապիտալ ծախսերին կուղղի․ «Այդ ուղղությամբ հստակ ծրագիր դեռեւս չկա»։
Ինչ վերաբերում է հանքահումքային ապրանքների լրացուցիչ հարկման ազդեցությանը, ապա պարոն Գալստյանն ասաց՝ Հայաստանում տեղի է ունենալու արտաքին հաշվեկշռի լավացում․ «Եվ հիմնական գործոններից մեկը, որն ազդում է արտաքին հաշվեկշռի դրական միտումի վրա, հենց այդ հանքահումքային ապրանքների միջազգային բարձր գներն են։ Արտահանումն ավելի մեծ ծավալի է լինելու»։
Հիշեցնենք, որ Ազգային ժողովն ընդունել է «Պետական տուրքի մասին» օրենքում փոփոխություններ եւ լրացումներ կատարելու մասին նախագիծը, որով սահմանվում է արտահանման լիցենզիոն տուրք սահմանել պղնձի, մոլիբդենի խտանյութի համար՝ ներկայիս գնի 15%-ի չափով:
Կարդացեք նաև
Նշենք, որ այսօր ԿԲ խորհուրդը որոշեց բարձրացնել վերաֆինանսավորման տոկոսադրույքը 0.5 տոկոսային կետով՝ սահմանելով 7.0։
Նելլի ԲԱԲԱՅԱՆ
