ԱԺ նորընտիր փոխնախագահ Ռուբեն Ռուբինյանն այսօր ԱԺ-ում լրագրողների հետ զրույցում խոսելով սահմանային լարվածության մասին՝ ասաց, որ դիրքորոշումը Փաշինյանը ներկայացրել է, այն է՝ դիտարկվում է հայ-ադրբեջանական սահմանի երկայնքով ռուս խաղաղապահների տեղակայման հարցը. «Հստակ է, որ Ադրբեջանը ունի նպատակադրում վնասել ՀԱՊԿ-ի վարկանիշին: Ընդհանրապես Ադրբեջանի գործողությունները ուղղված են նաեւ ՀԱՊԿ-ի դեմ եւ Արցախում ռուս խաղաղապահ առաքելության դեմ: Մենք մեզ հասու ամբողջ գործիքակազմը պիտի օգտագործենք ու մեր ՀԱՊԿ գործընկերների հետ քննարկումը շարունակենք»:
Հարցին՝ Փաշինյանը ՀԱՊԿ-ին էր դիմել ու նաեւ ասել, որ եթե չարձագանքեն, ԵԱՀԿ Մինսկի խմբին կդիմի, ինչ-որ ժամկետ կա՞, որից հետո նոր պետք է դիմենք ԵԱՀԿ-ին՝ Ռուբինյանը պատասխանեց, որ հստակ ժամկետ չկա, ամեն ինչ կախված է զարգացումներից:
Ռուբինյանի խոսքով՝ մեր բանակը մոտ մեկ շաբաթ առաջ ապացուցեց, որ ի զորու է կանգնեցնել ադրբեջանական հարձակումը, խոսքը Գեղարքունիքի դեպքերի մասին է. «Մենք կողմ ենք տարածաշրջանային կայունությանը եւ խաղաղությանը, մենք չենք ուզում պայթեցնել իրավիճակը տարածաշրջանում, եւ մենք առաջարկում ենք այսպիսի ճանապարհ, որը կբերի դեէսկալացիայի: Առաջարկը հայելային հետքաշման հետ կախված կապ չունի սահմանների հետ, կապ ունի զորամիավորումների տեղակայման հետ»:
Հռիփսիմե ՋԵԲԵՋՅԱՆ
