«Այսօրվա դատական նիստն էլ չի կայացել, առողջական խնդիրներ ունեի, այդ մասին հայտնել ենք դատավորին, նիստը հետաձգվել է»,-Aravot.am-ի հետ զրույցում ասաց ՍԴ նախկին նախագահ Հրայր Թովմասյանի նախկին խորհրդական, իրավաբան Գրիգոր Մուրադյանի շահերը դատարանում ներկայացնող փաստաբան Տիգրան Ղազարյանը:
Փաստաբան Ղազարյանն ասաց, որ հաջորդ նիստի ժամը եւ օրը կհայտնեն լրացուցիչ:
Հիշեցնենք, որ Վարչական դատարանը՝ Մհեր Պետրոսյանի նախագահությամբ քննում է Գրիգոր Մուրադյանի՝ Սահմանադրական դատարանի գործող նախագահ Արման Դիլանյանի դեմ հայցը։
Դատական վերջին նիստը նշանակված էր հունիսի 21-ին, սակայն այն չկայացավ՝ դատավորի՝ արձակուրդում գտնվելու պատճառաբանությամբ, որը հետաձգվել էր օգոստոսի 2-ին:
Կարդացեք նաև
Այս հայցով Հրայր Թովմասյանի նախկին խորհրդականը պահանջում է վերացնել Արման Դիլանյանի՝ ՍԴ նախագահի խորհրդականի պաշտոնից իրեն ազատելու մասին 2020 թվականի հոկտեմբերի կարգադրությունը, վերականգնել իրեն ՍԴ նախագահի խորհրդականի պաշտոնում, պարտավորեցնել վճարել հարկադիր պարապուրդի ժամանակահատվածի համար միջին աշխատավարձը։
Լուսինե ԲՈՒԴԱՂՅԱՆ
