«Հայաստան» դաշինքի ղեկավար, պաշտպանության նախկին նախարար Սեյրան Օհանյանը կարծում է, որ եթե պատերազմի հանգամանքներն ուսումնասիրող քննիչ հանձնաժողովը, որը մտադիր է նախաձեռնել իշխանությունը, վերջինս վերապահի ընդդիմությանը, ապա արդյունքում կլինի անաչառ քննություն։ Այս մասին այսօր նա խորհրդարանում ասաց լրագրողների հետ ճեպազրույցում։
«Եթե այդ հանձնաժողովում չի լինելու հավասար որոշումներ ընդունելու սկզբունք, ապա անիմաստ է խոսել այն մասին, որ անաչառ քննություն կանցկացնեն»,-նշեց նա։
Լրագրողները հիշեցրին, որ հունիսին Նիկոլ Փաշինյանը կրկին խոսեց Շուշիի մասին եւ սլաքներն ուղղեց դեպի Սեյրան Օհանյանը։ Վերջինս ասաց․ «Եթե Նիկոլ Փաշինյանը տիրապետում է պետական կառավարման, ռազմական կառավարման համակարգին, այն անձանց, որոնք այդ համակարգի ներսում են եղել եւ պաշտոններ զբաղեցրել, ապա ինքը եւ ժողովուրդը պետք է հասկանան՝ պետական կամ ռազմական պաշտոն չունեցած որեւէ անձ չէր կարող լծակ ունենար՝ այս կամ այն գործողությունը ղեկավարելու»։
Օհանյանի խոսքով՝ պատերազմի ընթացքում որոշումներ կայացնելու իրավունք ունեցել են պետությունը, գերագույն գլխավոր հրամանատարն ու ռազմական ղեկավարությանը․ «Ես նման հնարավորություններ եւ լծակներ չեմ ունեցել»:
Կարդացեք նաև
Անդրադառնալով այս տարվա հունվարին «Իմ քայլական» պատգամավոր Անդրանիկ Քոչարյանի ասածին, թե Սեյրան Օհանյանը պետք է բացատրի շքեղ առանձնատուն ունենալու փաստը, Սեյրան Օհանյանն ասաց․ «Մի բան կարող եմ ասել, որ Անդրանիկ Քոչարյանը դատավոր չէ: Բոլոր հնարավորություններն իրենք ունեին ստուգումներ իրականացնելու»։
Լուիզա ՍՈՒՔԻԱՍՅԱՆ
