8-րդ գումարման ԱԺ-ի առաջին նիստում ԱԺ նախագահի պաշտոնում առաջադրվել էին 3 թեկնածուներ, ընդդիմությունից՝ Մխիթար Զաքարյանն ու Արթուր Սարգսյանը, իշխանությունից՝ Ալեն Սիմոնյանը:
«Հայաստան» խմբակցության անդամները, տեսնելով, որ իրենց թեկնածուները զրկված են ԱԺ-ում ելույթ ունենալու հնարավորությունից, քանի որ կալանավորված են, երբ հերթը եկավ Ալեն Սիմոնյանի թեկնածության ներկայացմանը, ցուցադրաբար լքեցին նիստերի դահլիճը:
Հայկ Կոնջորյանը իր ելույթում ընդգծեց, որ իրենք «պողպատե մանդատի» ներկայացուցիչներն են ԱԺ-ում ու իրենց խմբակցության յուրաքանչյուր անդամ իր հետ դահլիճ է բերել ժողովրդի պատգամը. «Ոչինչ, ոչ մի բան չի խանգարելու, չի խոչընդոտելու մեզ արժանապատվորեն կատարելու ժողովրդի առջեւ ստանձնած պարտավորությունը եւ այդ պարտավորությունների մեկնարկը ԱԺ նախագահի թեկնածության առաջադրումն է»:
Կարդացեք նաև
Ալեն Սիմոնյանն իր ելույթում շնորհակալություն հայտնեց Արարատ Միրզոյանին, Լիլիթ Մակունցին, Հակոբ Սիմիդյանին ու ասաց, որ անմարդկային դժվար ճանապարհ են անցել իմքայլականների հետ. «Հպարտանում եմ ձեզանից յուրաքանչյուրով: Շնորհակալ եմ, որ պինդ մնացիք, հավատարիմ մնացիք ձեր սկզբունքներին, թիմին եւ մեր երկրին»:
Նա շնորհավորեց «Հայաստան» եւ «Պատիվ ունեմ» դաշինքներին ու համախմբման կոչ արեց. «Ես պատրաստ եմ մոռանալ փոքր տարաձայնությունները՝ հանուն մեծ նպատակների: ԱԺ համատեղ աշխատանքի կազմակերպման գործում ես ունեմ ձեզանից յուրաքանչյուրի աջակցության, խորհրդի կարիքը»:
ՔՊ-ից Նազելի Բաղդասարյանն իր ելույթում «շոու» որակեց «Հայաստան» խմբակցության պատգամավորների արարքը. «Քրեաիրավական պրոցեսները փորձեցին ներկայացնել քաղաքական սոուսի տակ: Բնականաբար, այդպես չի կարող լինել, որովհետեւ մենք իրավական գործընթացները հստակ տարանջատում ենք քաղաքականից: Մեր գործընկերները նման վարք են դրսեւորում, որովհետեւ իրենց կառավարման ժամանակաշրջանում ունեցել են գրպանային դատախազներ եւ դատավորներ, որոնք ընդամենը մեկ զանգով մարդկանց կարող էին ազատ արձակել: Այդ ժամանակներն անցել են եւ հավատացեք՝ չեն վերադառնալու»:
Հաշվիչ հանձնախմբի նախագահ է ընտրվել ՔՊ-ից Նարեկ Բաբայանը, քարտուղար՝ Քրիստինե Պողոսյանը: 16:30-ից պատգամավորները ԱԺ նախագահ են ընտրելու՝ փակ գաղտնի քվեարկությամբ:
Հռիփսիմե ՋԵԲԵՋՅԱՆ
