«Առաջարկում եմ ձեզ մտահոգող հարցը քննարկել համապատասխան ծառայության հետ»,-խորհրդարանում այսօր անդրադառնալով լրագրողների տեղաշարժի սահմանափակման փաստին՝ ասաց «Քաղաքացիական պայմանագիր» խմբակցության նորընտիր պատգամավոր Գուրգեն Արսենյանը։ «Լրագրողների իրավունքների սահմանափակումը ՀՀ քաղաքական ներկապնակում միշտ եղել է մի իրադարձություն, որից հետո լրագրողական համայնքը միահամուռ ջանքերն ուղղել է խոչընդոտներն ուղղելուն։ Կարծում եմ՝ դուք ձեր իրավունքները կպաշտպանեք։ Ես չեմ կարող կաշկանդվել լրագրողի աշխատանքից, ինչպես չեմ կաշկանդվում հացթուխի եւ վիրաբույժի աշխատանքից, որովհետեւ հանրության համար անհրաժեշտ աշխատանքի մասին է խոսքը»,-նշեց Գուրգեն Արսենյանը։
Ինչ վերաբերում է իշխանական պատգամավոր Ալեն Սիմոնյանի՝ ԱԺ-ում խստացված ծառայության վերաբերյալ այն ակնարկին, որ ժամանակին հոկտեմբերի 27 է եղել, Գուրգեն Արսենյանը նշեց․ «Եղել է հոկտեմբերի 27։ Ուրեմն չմոռանանք, որ եղել է եւ գանք շարունակությանը։ 1999թ․ այդ օրվա իրադարձությունները միշտ պետք է մեզ դաս տան, որպեսզի կարողանանք ապահովել խորհրդարանի գործունեությունը։ Նախորդ տարի նաեւ պատերազմ ենք ունեցել, սակայն այն չի ավարտվել։ Կա հրադադարի փաստաթուղթ, հետեւաբար չմոռանանք, որ Ադրբեջանը տեղափոխվել է մարտական գործողությունների դաշտ, ուստի հնարավորություն ունի ձեռքերը հասցնելու ՀՀ-ում պետական գործիչներին՝ այդ թվում օգտագործելով այն վիճակը, որը կա այսօր ՀՀ քաղաքական դաշտում։ Այսինքն, ՀՀ-ն ունի լեգիտիմ իշխանություն, ինչը չի գոհացնում ընդդիմությանը»։
Կարդացեք նաև
Հավելենք, որ երբ միջանցքում լրագրողները խնդրի մասին հարցրին իշխանական պատգամավոր Անդրանիկ Քոչարյանին, վերջինս ԶԼՄ-ների տեղաշարժի սահմանափակման հետ կապված միայն ասաց՝ «Ձեր անվտանգության համար է»։
Լուիզա ՍՈՒՔԻԱՍՅԱՆ
