«Հստակ է՝ սահմանադրության պահանջի համաձայն՝ պատգամավորն ազատությունից կարող է զրկվել միայն ԱԺ որոշմամբ։ Պատգամավորը ժողովրդի իշխանության կրողն է, որին քրեական հետապնդման հնարավոր է ենթարկել բացառապես ԱԺ-ի թույլտվությամբ՝ անձեռնմխելիությունը հաղթահարելուց հետո»,-խորհրդարանում լրագրողների հետ ճեպազրույցում այսօր ասաց «Պատիվ ունեմ» դաշինքի առաջնորդ Արթուր Վանեցյանը՝ անդրադառնալով «Հայաստան» դաշինքի անդամների կալանավորված պատգամավորների՝ Սյունիքի համայնքապետերի ազատման պահանջի բարձրաձայնմանն ԱԺ այսօրվա անդրանիկ նիստում։
«Եթե ԿԸՀ-ն թույլատրել է քրեական հետապնդում անել, դա հիմք չէ, որ արդեն ընտրված պատգամավորը զրկվի ազատությունից։ Թող ԱԺ գան միջնորդությամբ եւ պահպանեն սահմանադրությունը։ Եթե առաջին օրից սահմանադրություն են խախտում, սա լավ տեղ չի տանելու»,-նշեց Վանեցյանը։
Նրա խոսքով՝ համաձայն են «Հայաստան» դաշինքի այն մոտեցման հետ, որ քանի դեռ այս հարցը լուծված չէ, իրենք չեն մասնակցելու ԱԺ նախագահի ընտրությանը։
Լրագրողները հետաքրքրվեցին՝ հայտարարել էիք, որ որոշ դեպքերում կողմ եք քվեարկելու իշխանության օրինագծերին, ո՞ր դեպքերում այդպես կանեք։ Վանեցյանը պատասխանեց․ «Եթե բերեն օրինագիծ, որով կառաջարկվի պատերազմում զոհվածների ընտանիքների ամսական վճարներն ավելացնել։ Կամ, եթե բերեն անվտանգային համակարգի հետ կապված օրինագիծ, որն անհրաժեշտ է պետությանը»։
Կարդացեք նաև
Լուիզա ՍՈՒՔԻԱՍՅԱՆ
