Սյունիքի մարզի ընդհանուր իրավասության դատարանում սկսվել է Գորիս համայնքի «Գուսան Աշոտի անվան մշակույթի կենտրոն» ՀՈԱԿ-ի տնօրեն Հայկ Խաչատրյանի դատաքննությունը։ Նախագահող դատավորն է Նապոլեոն Օհանյանը։
Հայկ Խաչատրյանին մեղադրանք է առաջադրվել այն բանի համար, որ նա, լինելով տեղական ինքնակառավարման մարմնի՝ կազմակերպություն հանդիսացող հիմնարկի ղեկավար, ունենալով կազմակերպական-տնօրինչական, վարչատնտեսական գործառույթներ, ինչպես նաեւ օգտվելով կենտրոնի աշխատակիցների՝ իրենից ծառայողական կախվածության մեջ գտնվելու հանգամանքից, նույն կենտրոնի գրադարանավար Արմիդա Աղաբեկյանին եւ մյուս աշխատակիցներին հարկադրել է մասնակցել «Հայաստան» դաշինքի կողմից 2021թ. հունիսի 7-ին Գորիսում կայացած նախընտրական քարոզչության հանրահավաքին։ Իսկ հունիսի 15-ին սպառնացել է աշխատանքից ազատել գրադարանավար Արմիդա Աղաբեկյանին, խոչընդոտել է մասնակցել «Քաղաքացիական պայմանագիր» կուսակցության հանրահավաքին՝ աշխատակցուհուն անվանելով դավաճան:
Հայկ Խաչատրյանին մեղադրանք է առաջադրվել ՀՀ քրօրենսգրքի 149.1 հոդվածի 2-րդ մասի 1–ին եւ 2-րդ կետերով (նախընտրական քարոզչությանը մասնակցելուն կամ հանրաքվեի քարոզչություն կատարելուն կամ նախընտրական քարոզչությանը մասնակցելուց կամ հանրաքվեի քարոզչություն կատարելուց հրաժարվելուն հարկադրելը կամ նախընտրական քարոզչությանը մասնակցելուն կամ հանրաքվեի քարոզչություն կատարելուն խոչընդոտելը, որը կատարվել է ծառայողական կամ այլ կախվածությունն օգտագործելով եւ պաշտոնեական դիրքն օգտագործելով):
Դատավոր Նապոլեոն Օհանյանը հուլիսի 20-ի որոշմամբ պարզել է, որ Քրեական գործի նյութերում բացակայում են վարույթը կարճելու կամ քրեական հետապնդումը դադարեցնելու հիմքերը, ինչպես նաեւ խափանման միջոց կալանավորումը թողել է ուժի մեջ։
Կարդացեք նաև
Հայկ Խաչատրյանի պաշտպան Րաֆֆի Ասլանյանը վերաքննիչ քրեական դատարան բողոք է ներկայացրել՝ միջնորդելով բեկանել Սյունիքի մարզի ընդհանուր իրավասության դատարանի որոշումը, Հայկ Խաչատրյանի նկատմամբ խափանման միջոց կալանավորումը փոփոխել և նրա նկատմամբ ընտրել անազատության հետ չկապված որևէ խափանման միջոց, այդ թվում գրավի ձևով: Բողոքը վերաքննիչ դատարանի դատավոր Մխիթար Պապոյանի վարույթում է։
Իսկ Սյունիքի մարզի ընդհանուր իրավասության դատարանում Հայկ Խաչատրյանի դատաքննության հերթական նիստը նշանակվել է օգոստոսի 17-ին։
Հայկ Խաչատրյանի լուսանկարը` նրա ֆեյսբուքյան էջից
Արմեն ԴԱՎԹՅԱՆ
