Իտալական հերթական կապրիզներ՝ Գյումրու սրտում․ այլանդակել են «Եռանկյուն»-ի ֆիլմի շենքը

Գյումրու պատմական Ռուսթավելի փողոցի վրա՝ «Կումայրի» արգելոց- թանգարանի տարածքում գտնվող պատմամշակութային շենքերից մեկը, որտեղ նկարահանվել են հայտնի «Եռանկյունի» ֆիլմի որոշ դրվագներ, ամբողջովին ձևափոխել են՝ այլանդակելով կառույցի պատմական տեսքը։ Այստեղ այս պահին էլ ակտիվ շինարարություն է ընթանում․ փոխել են կառույցի պատուհանները՝ եվրոպատուհաններ տեղադրել, տանիք կառուցել։

Շինարարը քանդել է անգամ Ռուսթավելի փողոցի մայթերի սալիկները։ Հիշեցնենք՝ փողոցը վերանորոգվեց նախկին վարչապետ Կարեն Կարապետյանի ջանքերով ու դարձավ քաղաքի զբոսաշրջային կենտրոններից մեկը։ Գյումրիում այն հայտնի է նաև վարչապետի փողոց անվամբ։

Ո՞վ է թույլատրել այլանդակելու, ձևափոխելու պատմական կառույցի ֆասադը, ո՞ւմ ձեռագիրն է սա, այս հարցով դիմեցինք Գյումրու գլխավոր ճարտարապետ Հենրիկ Գասպարյանին, որը տեղեկացրեց՝ շինարարությունն ինքնագլուխ կատարում է Գյումրիում Իտալիայի պատվո հյուպատոս Անտոնիո Մոնտալտոն։

Ճարտարապետն ասաց, որ իրենք շինթույլտվություն չեն տվել պարոն Մոնտալտոյին, նա  ապօրինի շինարարություն է ծավալել, քաղաքապետարանը նրան երկու անգամ տուգանել է, մի անգամ 200 հազար դրամով, մյուս անգամ՝ 2,5 միլիոն դրամով։

Տեսնելով, որ հնար չկա՝ քաղաքապետարանը դիմել է ոստիկանություն։ Ի դեպ, ոստիկանության «Կումայրի» բաժնի նորակառույց շենքը մեր մատնանշած շենքի հարևանությամբ է։ Անտոնիո Մոնտալտոյին պատկանող «Վիլլա Կարս» հյուրանոցն էլ «Եռանկյունի» ֆիլմի շենքի դեմ-դիմաց է։

Թե ինչ է կառուցում նա, ճարտարապետն ասում է՝ չգիտենք, զրույցի չի բռնվում, հենց քաղաքապետարանից գնում են իր մոտ՝ հետները վիճաբանում է։

Շիրակի մարզի դատախազ Գուրգեն Գրիգորյանն էլ տեղեկացրեց, որ հարուցվել է քրեական գործ՝ ՀՀ քրեական օրենսգրքի 264 հոդվածի հատկանիշներով, այն է՝պատմամշակութային արժեքի վնասում կամ ոչնչացնումը։ Կատարվում է նախաքննություն։

Պատրաստ ենք լսել նաև Անտոնիո Մոնտալտոյին։

Նունե ԱՐԵՎՇԱՏՅԱՆ