«Օր առաջ դիմել էի Արարատ Միրզոյանին եւ առաջարկել արտակարգ նիստ հրավիրել՝ քննարկելու սահմանային իրավիճակը։ Երեք զոհ ունենք, իսկ Վարդենիսում ԱԹՍ-ներ էին թռնում։ Ասել, թե Ադրբեջանը պահելու է գրավոր եւ բանավոր պայմանավորվածությունները, «բլեֆ» է»,-ԱԺ արտահերթ նիստում, որի օրակարգում նախկինում քննարկված իրավական ոլորտի նախագծեր են, այսօր հայտարարեց պատգամավոր Նաիրա Զոհրաբյանը։
«Առաջիկայում Մոսկվայում բավականին ծանր բանակցություններ են սպասվում։ Հասկանում եմ, որ այս արտահերթ նիստի օրակարգի «էքշնը» եւ «իզյումինկան» քրեական օրենսգրքում փոփոխությունների նախագիծն է, որը ենթադրում է հայհոյանքի քրեականացում։ Սա արվում է, որովհետեւ նոր խորհրդարանում «էքշնի» եւ հայհոյանքի պակաս չի լինելու։ Բայց պնդում եմ, որ այս արտահերթից հետո պետք է նիստ հրավիրել, կանչել Նիկոլ Փաշինյանին, ՊՆ ղեկավարներին եւ, եթե կարիք կա, փակ ձեւաչափով քննարկում անել։ Մոսկվայում սպասվելիք բարդ, եռակողմ բանակցությունները հաշվի առնելով՝ չեմ ուզում, որ կրկնվի 44-օրյա պատերազմից հետո եւ առաջ իրավիճակը, երբ որեւէ մեկը ոչինչ չգիտեր։ Պետությունն ու սահմաններն են վտանգված, իսկ հայհոյանքը քրեականացնելու համար դեռ ժամանակ կունենաք»,-նշեց Նաիրա Զոհրաբյանը։
Լուիզա ՍՈՒՔԻԱՍՅԱՆ
