«Այսօր էլ մեր երկրի նկատմամբ սպառնալիքները չեն նվազել, այսօր էլ շարունակում ենք ունենալ զոհեր, ներդրումներ չեն լինում, կապիտալը մեր երկրից փախչում է, այսօր մեր երկրում նաեւ պարենային անվտանգության խնդիրներ են առաջացել»,-«Հայելի» ակումբում կազմակերպված ասուլիսում այսօր ասաց տնտեսագետ Թադեւոս Ավետիսյանը:
Ըստ նրա՝ Արցախը սնում էր նաեւ Հայաստանը՝ էլեկտրաէներգիայով, հացամթերքով, գյուղատնտեսական մթերքներով. «Արցախը մեր տնտեսության լոկոմոտիվներից էր: Հիմա թող գնան, միջազգային շուկաներից արդեն կրկնապատկված գնով ցորեն գնեն, որ ոչ միայն Հայաստանի, այլեւ Արցախի պահանջարկը բավարարեն: Դրա համար է, որ հաց-հացամթերքի գները տոկոսներով աճում է, ունենք առաջանցիկ գնաճ եւ երկու անգամ մարդկանց եկամուտների աճը գերազանցում է»:
Թադեւոս Ավետիսյանի խոսքով, գնաճը թալանում է մարդկանց եւ նաեւ նրանց, որոնք իրենց ձայնը տվել են «այս ապիկար իշխանություններին»: «Գնաճի պատասխանատուները այս իշխանություններն են, որովհետեւ գնաճը ոչ թե հրահրվում է հների կողմից կամ Մոզամբիկի կառավարություններն են գնաճ խրախուսում Հայաստանի հանրապետությունում, այլ՝ գնաճի դեմ պայքարը Սահմանադրությամբ եւ մնացած օրենքներով պատասխանատվությունը դրված է այսօրվա իշխանության վրա, որը հետեւողականորեն ձախողում է: Եվ դրանից հետո ինչ-որ թվեր են կառուցում ինչ-որ միֆեր եւ ասում՝ տեսեք՝ ինչքան լավ ենք մենք ապրում: Բա որ ամեն ինչ այսքան լավ է, ինչո՞ւ է տնտեսության իրական հատվածը նվազում, առևտուրը նվազում: Եթե դուք թոշակ, նպաստ չեք բարձրացրել, եթե նվազագույն աշխատավարձը չեք բարձրացրել, սննդամթերքի գները երկնիշ աճել են, ո՞նց եք անում լավ ենք ապրում: Երբ մարդիկ լավ-վատ ապրում էին: Բայց ձեր վարած քաղաքականության արդյունքում աղքատներին դարձրիք ծայրահեղ աղքատ»:
Լուսինե ԲՈՒԴԱՂՅԱՆ
