Օրերս Aravot.am-ում հրապարակեցինք տեղեկություն, որ Լոռու մարզի մի քանի համայնքների ղեկավարներ հրաժարականներ են ներկայացրել:
Ըստ շրջանառվող լուրերի՝ համայնքապետերը պաշտոններից ազատվել են Լոռու մարզպետ Արամ Խաչատրյանի հրահանգով, պատճառն էլ եղել է ԱԺ ընտրություններում Նիկոլ Փաշինյանի կուսակցությանը չսատարելը: Համայնքապետերը թեեւ հերքեցին այդ լուրերը, նշելով այլ պատճառաբանություն:
Aravot.am-ը փորձեց մարզի ղեկավարից ճշտել, թե որո՞նք են համայնքի ղեկավարների պաշտոններից ազատման պատճառները եւ արդյոք դրանք կապվա՞ծ են ԱԺ ընտրությունների արդյունքների հետ. «Ոչ, ես համենայն դեպս նման տեղեկություն չունեմ: Նշված համայնքապետերն իրենց դիմումի համաձայն են հրաժարականներ ներկայացրել եւ պատճառներն էլ նշել են: Ես այստեղ որեւիցե կապ չունեմ, հարգում եմ իրենց որոշումն ու ի գիտություն եմ ընդունում: Որ համայնքներում, որ այս պահի դրությամբ հրաժարական են տվել, օրենքով սահմանված կարգով մենք ժամանակավոր պաշտոնակատարներ ենք նշանակել: Առաջիկայում կլինեն ընտրություններ եւ ժողովուրդը կորոշի, թե տվյալ համայնքում առաջիկա 5 տարիներում ով կղեկավարի համայնքը»,- ասաց Արամ Խաչատրյանը:
Տաթեւիկ ՂԱԶԱՐՅԱՆ
