Այսօր Շիրակի մարզպետ Հովհաննես Հարությունյանը լրագրողների հետ զրույցում, անդրադառնալով առաջիկա ՏԻՄ ընտրություններին, մասնավորապես Գյումրիում ՔՊ-ից քաղաքապետի թեկնածու առաջադրելուն, ասաց․ «Այդ մասին դեռ վաղ է իմ կողմից բարձրաձայնելը, քանի որ քաղաքական որոշում պետք է լինի։
«Քաղաքացիական պայմանագիր» կուսակցության վարչության նիստի արդյունքում կարձանագրվի այն թեկնածուի անունը, որը որ պիտի գլխավորի «Քաղաքացիական պայմանագիր» կուսակցության ցուցակը թե՛ Գյումրիում, թե՛ մնացած տեղերում։ Այնպես որ, կարծում եմ, մենք ունենք ժամանակ, բայց շատ քիչ, և ինձ թվում է՝ շուտով բոլորն այդ մասին տեղյակ կլինեն»։
Այն հարցին էլ, թե մարզպետի կարծիքը կլսե՞ն թեկնածուներ առաջադրելիս՝ նա պատասխանեց, որ ներքին աշխատանքային հարաբերություններ են, որոնց մասին չի կարող բարձրաձայնել։
Կարդացեք նաև
Մարզպետը խոսեց նաև ներդրումներից, աշխատուժի պակասից։
Նա ասաց, որ մարզում անհրաժեշտ են այնպիսի ներդրումներ, որոնք աշխատատեղեր ստեղծեն՝ մարզի բնակիչներին աշխատանքով ապահովելու համար, այլ ոչ թե այնպիսի կազմակերպություններ ստեղծեն, որ մարզից ոչ մեկը չկարողանա աշխատել։
Հովհաննես Հարությունյանի տեղեկացմամբ, այս պահին Շիրակի մարզում կա բանվորների ու վերապետների մեծ կարիք, շինարարական կազմակերպություններն այդ մասին են ահազանգում։
Հովհաննես Հարությունյանի մեկնաբանմամբ, շինարարական աշխատանքները մի քիչ ուշ սկսվեցին, մարդիկ ստիպված գնացին արտագնա աշխատանքի։
«Հիմա մենք մեր խողովակներով փորձում ենք տեղյակ պահել այդ մարդկանց, որ այստեղ նույնպես կա աշխատանք, միգուցե նրանք ավելի շուտ վերադառնան և համալրեն այդ շինարարական կազմակերպությունները և կարողանան մասնակցել այդ աշխատանքներին, տեղում ունենան աշխատանք», -ասում է մարզպետը։
Նա նաև նշում է, որ իր առաջին գործերից մեկը կլինի աշխատուժի հստակ քարտեզագրումը, դա արդեն իր գլխում պատրաստ է։
«Կարելի է արդեն թղթին հանձնել, ու մենք կտեսնենք՝ ինչ աշխատուժի հնարավորություն ունենք մարզում, ինչքան աշխատողներ ունենք, որոնք կարող են բանվորական աշխատանքներ կատարել, որոնք վարպետներ են, նեղ մասնագիտություններ ունեն, որոնք կարող են իրենց աշխատանքը իրականացնեն տարբեր ոլորտներում։ Իրականում պատկերը մի քիչ տխուր է, որովհետև սոցիալական ծանր բեռն ունենալով՝ շատ մարդիկ չեն զբաղվել ինքնակրթությամբ, չեն կրթվել և այդ մասնագիտությունների առկայության վակուում է առաջացել , մեզ ժամանակ է պետք, որպեսզի այդ վակուումը լցնեք»։
Նա նշեց, որ աշխատատեղերը պետք է ստեղծվեն՝ այդ տրամաբանությունից ելնելով։
Նունե ԱՐԵՎՇԱՏՅԱՆ
