Վարչապետի պաշտոնակատար Նիկոլ Փաշինյանն այսօր հանդիպել է «Քաղաքացիական պայմանագիր» կուսակցության խորհրդարանական նորընտիր խմբակցության ներկայացուցիչների հետ։ ՔՊ անդամ Ալեն Սիմոնյանի փոխանցմամբ՝ քննարկել են գալիք աշխատանքները, կառավարություն-ԱԺ համագործակցության հարցերը։
«Որոշվել է 44-օրյա պատերազմի վերաբերյալ քննիչ հանձնաժողով ստեղծել։ Իշխող ուժն արդեն կայացրել է այդ որոշումը եւ նախաձեռնողն ինքն է լինելու։ Կարծում ենք՝ այդ հարցում արտախորհրդարանական ընդդիմության մասնակցությունը եւս պետք է լինի։ Չպետք է սահմանափակվել միայն ԱԺ խմբակցություններով»,-լրագրողների հետ ճեպազրույցում ասաց Ալեն Սիմոնյանը։
Նրա խոսքով՝ փորձելու են հասկանալ, թե այդ նպատակով ինչ օրենսդրական լուծումներ է հնարավոր գտնել․ «Իսկ հանձնաժողովի օբյեկտիվության վերաբերյալ գնահատականները հնչեցվել են ընտրություններից առաջ։ Ժողովուրդը հունիսի քսանին տվեց բոլոր հարցերի պատասխանները»։
Ալեն Սիմոնյանը նաեւ նշեց, որ սահմանային իրավիճակի առնչությամբ քննարկում չեն ունեցել։ Նաեւ տեղեկացրեց՝ այս պահին չի կարող ասել, թե իրենց թիմակիցներից Արարատ Միրզոյանն ու Տիգրան Ավինյանն առաջիկայում պաշտոն կունենա՞ն, թե ոչ։
Կարդացեք նաև
Լուիզա ՍՈՒՔԻԱՍՅԱՆ
