Հուլիսի 26-ին Բարձրագույն դատական խորհուրդը (ԲԴԽ) հրապարակեց խորհրդի նախագահ Ռուբեն Վարդազարյանին կարգապահական պատասխանատվության ենթարկելու՝ Կոռուպցիայի կանխարգելման հանձնաժողովի միջնորդության վերաբերյալ խորհրդի որոշումը (նախագահող՝ Գագիկ Ջհանգիրյան):
Գագիկ Ջհանգիրյանը հայտարարեց. «ԲԴԽ-ն, դռնբաց նիստում քննության առնելով Կոռուպցիայի կանխարգելման հանձնաժողովի՝ ԲԴԽ նախագահ Ռուբեն Վարդազարյանին կարգապահական պատասխանատվության ենթարկելու վերաբերյալ միջնորդությամբ դիմելու մասին մայիսի 12-ի որոշումն ու փաստաթղթերը, որոշեց Կոռուպցիայի կանխարգելման հանձնաժողովի միջնորդությունը մերժել: Որոշումը վերջնական է, ուժի մեջ է մտնում հրապարակման պահից»:
Նիստի ընթացքում Գագիկ Ջհանգիրյանը նաև նշեց. «ԲԴԽ-ն կարևորում է խորհրդի նախագահի և անդամների կողմից բարեվարքության ստուգման ընթացքում գույքի և եկամուտների վերաբերյալ պարզաբանում ներկայացնելու անհրաժեշտությունը, քանի որ ի վերջո՝ մյուս բոլոր դատավորների բարեվարքության ստուգումն իրականացնում է խորհուրդը: Սակայն օրենքով նախատեսված համապատասխան ժամկետները խախտված լինելու պատճառով ԲԴԽ-ն գտել է, որ չի կարող Վարդազարյանին պատասխանատվության ենթարկել»:
Նշենք՝ Ռուբեն Վարդազարյանին մեղադրանք է առաջադրվել՝ ՀՀ ՔՕ 332-րդ հոդվածի 3-րդ մասի (պաշտոնեական դիրքն օգտագործելով արդարադատության իրականացմանը խոչընդոտելու) հատկանիշներով։ Նրա նկատմամբ որպես խափանման միջոց է կիրառվել ստորագրությունը՝ չհեռանալու մասին։
Կարդացեք նաև
Տաթև ՀԱՐՈՒԹՅՈՒՆՅԱՆ
