«Ազատություն». Միացյալ Նահանգների Կոնգրեսի Ներկայացուցիչների պալատի անդամներ Դեյվիդ Սիսիլինին և Գուս Բիլիրակիսը կոչ են անում Պետքարտուղարությանը դադարեցնել անօդաչու թռչող սարքերի ամերիկյան տեխնոլոգիաների Թուրքիա արտահանման լիցենզիաների տրամադրումը, մինչև պաշտոնական հետաքննություն չանցկացվի Կովկասում, Հարավային Ասիայում, Միջերկրականի արևելքում և ամբողջ աշխարհում Թուրքիայի անօդաչուների ապակայունացնող դերի առնչությամբ։
Ուրբաթ օրը երկու կոնգրեսականները հորդորել են գործընկերներին միանալ իրենց նամակին, որում կոչ է արվում պետքարտուղար Անտոնի Բլինքենին զեկույց ներկայացնել Թուրքիայում անօդաչուների արդյունաբերության մասին՝ ներառո՞ւմ է արդյոք այն ամերիկյան տեխնոլոգիաներ՝ խախտելով գործող պատժամիջոցները, և ՆԱՏՕ-ի կանոնների և կանոնադրության հերթական խախտում չե՞ն արդյոք Անկարայի գործողությունները:
Միջին Արևելքի ֆորումի Վաշինգտոնի նախագծի տնօրեն Քլիֆ Սմիթը հայտարարել է, որ Ռեջեփ Էրդողանի օրոք նախագահության Թուրքիան ավելի ու ավելի է դառնում դաշնակից միայն անունով՝ օգտագործելով ՆԱՏՕ-ին անդամակցությունը որպես վահան քննադատության դեմ, և չի գործում որպես իրական դաշնակից, նաև ասված է Վաշինգտոնի Հայ դատի գրասենյակի հաղորդագրությունում։
Լիլիթ ՀԱՐՈՒԹՅՈՒՆՅԱՆ
