Վերջին շրջանում հաճախ ենք լսում, թե իրենց բնակավայրերում մարդիկ են մոլորվել եւ գերի ընկնել Ադրբեջանի վերահսկողության տակ անցած տարածքներում: Սա նոր ու տարօրինակ երեւույթ է մեզանում: Շիրակի պետական համալսարանի դասախոս Արթուր Համբարձումյանը խիստ կասկածում է, որ գերի ընկնելն իրոք այնպես է լինում, ինչպես տարածվում է պաշտոնական աղբյուրներով:
«Ըստ երեւույթին՝ այդ մարդկանց առեւանգում են իրենց հողերից, տներից: Կառավարությունն էլ հո չի՞ ասի, թե դիվերսիոն խումբը կամ թշնամական մի այլ խմբավորում մտավ՝ տարավ: Հանրությանը տեղեկություն ներկայացնելու ամենահեշտ տարբերակը մոլորվելու վարկածն է: Գուցե 10-ից մեկը, իսկապես, մոլորվի: Բայց ինչպե՞ս կարող են քսան, երեսուն, հիսուն տարի իրենց գյուղում քաղաքում ապրած մարդիկ, որ ծանոթ են ամեն քարին ու թփին, առանց արեգակի կարող են կողմնորոշվել, թե որն է հյուսիսը, հարավը, արեւելքը, արեւմուտքը, հանկարծ սկսեցին իրար հետեւից մոլորվել ու անցնել Ադրբեջանի կողմը: Էդպես չի կարող լինել, էդպես չի լինում: Հնարավոր է նաեւ՝ ինչ-որ տարածքներ սուսուփուս թշնամուն հանձնելով սահմանն է մոտեցել, եւ մարդիկ դրանից տեղյակ չեն: Այս երկուսից որն էլ լինի, գալիս՝ տանում են, կամ քո տարածքում ես գերի ընկնում, դավադրություն է»,-ասաց Արթուր Համբարձումյանը:
Աշոտ ՀԱԿՈԲՅԱՆ
