ՀԺ-ի զրույցում Խաչատուր Սուքիասյանի եղբոր՝ Ռոբերտ Սուքիասյանի պաշտպան Գոռ Միքայելյանն՝ անդրադառնալով իր պաշտպանյալի կալանավորմանը, ընդգծեց՝ դատարանի որոշումը ոչ իրավաչափ է:
«Ռոբերտ Սուքիասյանին մեղադրանք չէր առաջադրվել, վերջինս ունեցել է կասկածյալի կարգավիճակ, մեղադրանքը առաջադրվել է կալանավորման միջնորդությունը ներկայացնելուց ժամեր անց, հետևաբար մեղադրող կողմի միջնորդությունը ենթակա էր մերժման։ Դատական նիստի ընթացքում քննիչը մի կերպ փորձում էր սխալների տակից դուրս գալ: Դատավորն էլ հարցնում էր քննիչին՝ դուք ունեցե՞լ եք պրակտիկա, որ այս իրավիճակում մարդուն տանեք կալանքի և կալանքը դատարանը բավարարի: Դատավորն էլ էր տեսնում, որ սա բավարարելու կալանք չէ»:
– Պարոն Միքայելյան, նշեցիք, որ դատավորը հասկանում էր, որ սա բավարարելու կալանք չէ, այդ դեպքում ինչպե՞ս կմեկնաբանեք նրա որոշումը:
-Որոշումն այնքան տարօրինակ էր: Կարծում եմ՝ դատավորը վախ ուներ, որ բերել են, ուրեմն պետք է բավարարի:
Կարդացեք նաև
– Կալանավորման ի՞նչ հիմքեր են ներկայացվել դատարանին:
– Երկու հիմք է ներկայացվել՝ քննության խոչընդոտումը և նոր հանցանք կատարելը: Նոր հանցանք կատարելու հիմքը դատարանը չի հաստատել, հաստատել է քննության խոչընդոտումը:
– Իսկ ի՞նչ ապացույցներ են ներկայացվել:
-Կոնկրետ խուլիգանության մասով որևէ ապացույց չի ներկայացվել: Որ կրակոց է արձակել, մենք դա չենք էլ հերքում, բայց դա չի նշանակում, որ դա իրենից խուլիգանություն է ենթադրում:
– Դուք նշում եք, որ Ռոբերտ Սուքիասյանը պաշտպանվելու նպատակով է կրակել: Կմանրամասնե՞ք ումից է պաշտպանվել, ի՞նչ հանգամանքներ են եղել, չի՞ եղել հնարավորություն առանց զենքի կիրառման վիճաբանությունը հարթել:
– Ռոբերտ Սուքիասյանը դեպքի վայրում հայտնվել է պատահական, երբ արդեն վիճաբանությունը սկսված է եղել: Հարթելու փորձեր եղել են, բայց այլ տարբերակ չի եղել: Բայց ես ավելին չեմ կարող մանրամասնել, թե կոնկրետ ով ում վրա է հարձակվել, ինչպես է եղել: Կստացվի՝ ես եմ արդեն ցուցմունք տալիս:
ԱՆՅՈՒՏԱ ԱԹԱՆԵՍՅԱՆ
Հոդվածն ամբողջությամբ՝ «Հայկական ժամանակ» օրաթերթի այսօրվա համարում
