Ադրբեջանի հարցերով փորձագետ Արմինե Ադիբեկյանը անդրադարձել է Ալիեւի ռազմատենչ հայտարարություններին, վերջին օրերին Երասխի ուղղությամբ կրակոցներին եւ Հայաստանի սահմանի տարբեր հատվածներում Ադրբեջանի ագրեսիվ գործողություններին:
«Այդ ամենը համարում եմ բնական, որովհետեւ այդ խոստումներն ու ծրագրերը կյանքի են կոչվել սկսած հանրահայտ վերելակային դիվանագիտությունից: Ու այդ օրվանից Ալիեւը անցավ գործի՝ իրականացնելով իր բոլոր աներեւակայելի ու չիրականացված իղձերը: Եվ Հայաստանի իշխանության ապիկար, ապազգային քաղաքականության, կապիտուլյացիայի հետեւանքով, ռազմական գործողությունների սաբոտաժով թշնամին մոտեցավ Երեւանին, որը նա համարում է ադրբեջանական քաղաք եւ պլանավորում օկուպացնել նաեւ Երեւանը: Սա է իրավիճակը: Եվ եթե այսպես շարունակենք, ապա դա է լինելու հավանական ապագան»,-ասաց նա:
Մեկնաբանելով երկրի անվտանգության առջեւ ծառացած իրական սպառնալիքների ֆոնին ԱԺ իմքայլական պատգամավորների հրավիրած արտահերթ նիստը եւ իրենց «ձեռքի ծախսը» հնգապատկելու որոշումը՝ տիկին Ադիբեկյանն ասաց. «Այդ հարցն ամենաակտուալն է այսօր:
Պատգամավորների դրամավճարներն ավելացնելուն զուգահեռ կրճատվում է բանակը: Երեք հազար հոգի միայն ՊՆ եւ գենշտաբի անձնակազմից են ազատվելու: Դա, եթե հաշվենք մեկ ընտանիքը չորս անձ, նշանակում է, որ 12 հազար մարդ մնալու է առանց եկամուտի, առանց հացի: Ես հակված եմ նրան, որ այդ գումարներն ազատվում են, որպեսզի ապահովեն Փաշինյանի աշխատակազմին, անձամբ նրան լոյալ մարդկանց, որովհետեւ փողը մարդուն կաշառելու եւ իշխանությանը կապելու ամենալավ միջոցն է:
Կարդացեք նաև
Ես դեռ չեմ խոսում կրճատվող ուրիշ մանր ծախսերի մասին: Օրինակ, որ եթե մինչեւ այսօր սեփականաշնորհման վկայականները տպագրում էին բարձրորակ թղթի վրա, հիմա ընդամենը քսերոքս են տալիս: Անգամ այդ ծախսերը չեն ուզում անել: Իշխանությունը կրճատում է անհրաժեշտ եւ ոչ անհրաժեշտ ծախսերը՝ սեփական գրմանները լցնելու նպատակով, լոյալ զանգվածին ապահովելու համար»:
Աշոտ ՀԱԿՈԲՅԱՆ
