Առողջապահության նախարարության կանխատեսումներով՝ կորոնավիրուսով վարակման նոր դեպքերի աճի տեմպը շարունակվելու է մոտակա օրերին։ Այս մասին այսօր կառավարության նիստում ասաց առողջապահության փոխնախարար Լենա Նանուշյանը։ Նա ասաց, որ ներկա պահին 3790 քաղաքացի բուժում է ստանում, որից 606-ը՝ հիվանդանոցային, նրանցից 282-ը ծանր վիճակում են, ծայրահեղ ծանր վիճակում է գտնվում 48 քաղաքացի։
«Մեր տարածաշրջանում համաճարակային վիճակը լարված է, եվրոպական որոշ երկրներում նույնպես շարունակվում է աճ գրանցվել, սակայն այն երկրներում, որտեղ պատվաստված քաղաքացիների մասնաբաժինը մեծ տոկոս է, հոսպիտալացումն ու մահերը քիչ են»,-ասաց տիկին Նանուշյանը։
Վարչապետի պաշտոնակատար Նիկոլ Փաշինյանն էլ հավելեց՝ պատվաստումները պետք է ինտենսիվորեն շարունակել, փակ տարածքներում դիմակների կրման պրակտիկան բարձր մակարդակի վրա պահել․«Անցյալ տարվա մայիսից որդեգրել ենք քաղաքականություն, որ պետք է սովորենք ապրել կորոնավիրուսի հետ, ունենք նման որոշում եւ հույս ունեմ, որ գործնականում կկարողանանք իրագործել, որ մենք լոքդաունների չենք գնալու ընդհանրապես։ Բայց սա պետք է անենք համատեղ ուժերով»։
Լենա Նանուշյանն ասաց, որ օրական հինգ հազարից ավելի պատվաստումներ են կատարվում, այս թվում, ըստ փոխնախարարի, օտարերկրացիների մասնաբաժինը քիչ է։ Փաշինյանն ասաց, որ պետք է օրական վիճակագրություն վարել, թե պատվաստումների մեջ քանիսն են օտարերկրացիներ․ «Մենք պայմանավորվել ենք, որ հայաստանցիների պատվաստման օրական առնվազն հինգ հազար տեմպը պետք է պահենք»։ Նա ասաց, որ պետք է շարունակեն պետական գերատեսչություններում պատվաստումների գործընթացն առաջ տանելը, ջանք գործադրեն, որ փակ տարածքներում դիմակի կրման կանոնը պահպանեն, որպեսզի ստիպված չլինեն վարչական ներգործության գնալ․ «Եթե վիճակագրությունը ստիպի, մենք ստիպված կգնանք այդ ուղղությամբ»։
Կարդացեք նաև
Նելլի ԲԱԲԱՅԱՆ
