Տարբեր, այդ թվում արտասահմանյան, ԲՈՒՀ-երում դասերը սերտած, միջազգային սեմինարներում մասնակցած և տրված կուրսերն անգիր արած «գերազանցիկ մասնագետներն» այսօր ղեկավարում են Հայաստանի կարևոր գերատեսչությունները, կամ «անկախ» փորձագետի անվան տակ «լրջագույն» վերլուծություններ անում և խորհուրդներ տալիս իրենց պաշտելի իշխանությանը։
Որո՞նք են այդ քայլերն ու խորհուրդները․Հայաստանը պետք է դիմի միջազգային հանրությանը, ԱՄՆ-ին, Ֆրանսիային, ԵԱՀԿ-ին, ՄԱԿ-ին։ Հայաստանի ԱԳՆ նորանշանակ նախարարի տեղակալը Հայաստանի սահմաններում տիրող իրավիճակը ներկայացրել է ՀՀ-ում հավատարմագրված դեսպաններին։ ՀՀ ՊՆ ներկայացուցիչը նույն արել է դեսպանատների ռազմական կցորդներին։ Ծափահարություններ․․․
Իսկապե՞ս, դուք հավատացել և հավատում եք, որ տարբեր երկրներ, միջազգային կառույցներ, իրականում գործում են այդ նույն կառույցների կանոնակարգերով և միջազգային նորմերի սկզբունքներին համապատասխան։ Չե՞ք տեսնել և տեսնում թե աշխարհում ինչ է կատարվել և կատարվում։ Իսկապե՞ս դուք կարծում եք, թե Հայաստանում հավատարմագրված դեսպանները տեղյակ չեն իրավիճակից և այժմ տեղեկանալով «լուրջ» քայլերի կդիմեն։
Այդպես էլ չհասկացանք, որ ցանկացած պետություն առաջին հերթին իր ուժերով պետք է ամրապնդի իր երկրի անվտանգությունը։ Չհասկացանք, որ ամեն պետություն առաջնորդվում է ոչ թե հումանիզմով և «արդարությամբ», այլ միայն ու միայն իր երկրի պետական շահերով։ Չհասկացանք, որ միջազգային կառույցներն ընդամենը հարթակ են սեփական երկրի շահերի քարոզչության համար։ Չհասկացանք, որ միջազգային, այսպես կոչված նորմերը բազմակի ստանդարտներով են գործում՝ ի շահ ուժեղի։ Չհասկացանք, որ հղումները նույն տարբեր միջազգային նորմերի վրա, երբ դու և քո երկիրը պարտված, ողորմելի վիճակում եք, ընդամենը մյուս երկրների քմծիծաղին և արհամարհանքին է արժանանում։
Կարդացեք նաև
Չհասկացանք,որ միջազգային հանրություն, որպես կուռ կառույց գոյություն չունի, որ այդ կառույցում երկրներն ունեն լուրջ հակասություններ և շահեր։ Չհասկացանք, որ եթե դու անընդունակ ես պաշտպանել քո երկիրը, քո փոխարեն այլ երկրների զինվորները չեն զոհվելու հանուն հայ բազմաչարչար ժողովրդի։ Չհասկացանք, որ եթե դու կռվում և պաշտպանում ես քո երկրի սահմաններն ու քո ժողովրդին, ապա ունենում ես դաշնակիցներ։ Չհասկացանք, որ անկախ կնքված և ստորագրված փաստաթղթերից, եթե դու ողորմելի ես, ապա չունես դաշնակից։
Չհասկացանք, որ պարտված, իր երկիրը պաշտպանելու անընդունակ ժողովրդին խղճում և արհամարհում են, հարգելով քո ուժեղ թշնամուն։ Չհասկացանք, որ լավագույն դեպքում ողորմելիին ընդամենը հումանիտար օգնություն կտրամադրեն, ոչ ավելին։
Ավետիք Իշխանյան
