Փաստաբան Լեւոն Բաղդասարյանն այսօր անդրադարձել է հետընտրական Հայաստանի կրիմինալ վիճակին եւ իշխանության իրավական վարքագծին:
«Հասարակության մի ստվար զանգվածի կարող է չհետաքրքրել հանցագործ կյանքով ապրող անձանց եւ իրավապահների գործունեությունը: Բայց մի փոքր հետ գնամ: Երբ Երեւանի կենտրոնում, այն էլ՝ հրազենի օգտագործմամբ, տեղի են ունենում մահափորձեր, սպանություններ, կամ զենքի գործադրմամբ խուլիգանություն եւ դրանք դառնում են սովորական երեւույթներ, դա նշանակում է, որ կրիմինալ աշխարհը ընտրության առաջ կանգ չի առնում: Եթե նախկինում այդ կարգի առերեւույթ հանցագործություններ էին տեղի ունենում բնակավայրերից դուրս՝ գերեզմանոցներում, այսօր դրանք տեղի են ունենում քաղաքացու աչքի առաջ:
Հայաստանը, մասնավորապես, Երեւանը մշտապես աչքի է ընկել որպես անվտանգ քաղաք: Այսօր քաղաքացու անվտանգությունը պաշտպանված չէ: Այստեղ ուրույն դերակատարություն ունեն իրավապահ մարմինները ինչպես հանցագործությունների կանխմանն ուղղված տարվող օպերատիվ հետախուզական աշխատանքներում, այնպես էլ քաղաքի բանուկ մասերում: Որպես իրավապաշտպան, արձանագրում եւ ահազանգում եմ, որ հաճախակի դարձած ռազբորկաները քաղաքի բանուկ մասերում օրը ցերեկով բացահայտ կերպով աղերս ունեն հանցագործ կլանների, մասսաների ամենաթողության հետ եւ, ինչու չէ, կարող է լինել նաեւ իշխանական բուրգում հովանավորներ ունենալուն, ինչը անթույլատրելի է: Ես կարծում եմ՝ առանց իշխանության հովանավորության այսպիսի բեզպրեդել մենք չէինք կարող ունենալ քաղաքի բանուկ մասերում»:
Աշոտ ՀԱԿՈԲՅԱՆ
