Ռուսաստանը պատրաստ է ողջունել Եվրամիության երկրների միջնորդական ջանքերը Լեռնային Ղարաբաղի հարցով բանակցություններում, եթե նրանք կնպաստեն եղած պայմանավորվածությունների իրականացմանը: Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը:
«Եթե միջնորդական ջանքերը կրեն կայուն, կանխատեսելի բնույթ և օգնեն առկա պայմանավորվածությունների իրականացմանը, ապա դրանք կարելի է ողջունել: Ընդհանուր առմամբ այդ ուղղությամբ աշխատանքը վատ չի ընթանում»,- ասել է Պեսկովը՝ ի պատասխան լրագրողների խնդրանքի՝ մեկնաբանել ԵՄ-ից հնչող մեկնաբանությունները ԼՂ հարցով բանակցային ձևաչափում ներգրավվելու մտադրությունների մասին:
Կրեմլի ներկայացուցիչը հիշեցրել է, որ Ռուսաստանի, Ադրբեջանի և Հայաստանի առաջնորդների եռակող պայմանավորվածությունները ձեռք են բերվել «նախագահ Վլադիմիր Պուտինի միանգամայն եռանդուն ջանքերով»:
«Նա մշտական կապի մեջ է վարչապետ Փաշինյանի և նախագահ Ալիևի հետ: Հիմա զբաղվում է հենց այդ ձեռք բերված պայմանավորվածությունների իրականացման, կյանքի կոչման հարցերով»,- ասել է Պեսկովը:
Կարդացեք նաև
Պատրաստեց Վիկտորյա ԱՆԴՐԵԱՍՅԱՆԸ
