«Փաստենք, որ Ադրբեջանը ցանկացած իրավիճակի համար ունի սցենարային զարգացումներ, որոնցից մեկը ենթադրում էր Արցախից հետո ՀՀ տարբեր ռազմավարական օբյեկտների հանդեպ վերահսկողություն, ինչը նրանց հնարավորություն կտա հիմա եւ հետագայում ՀՀ-ի հանդեպ ունենալ ճնշման լծակներ, որոնք կօգտագործվեն իր առավելագույն պահանջածին հասնելու համար»,-«Հայելի» մամուլի ակումբում լրագրողների հետ հանդիպմանն այսօր անդրադառնալով հայ-ադրբեջանական շփման գծի Երասխի հատվածում հակառակորդի կողմից լարվածությանը՝ ասաց «Հենակետ» վերլուծական կենտրոնի ղեկավար, «Պատիվ ունեմ» դաշինքի ներկայացուցիչ Տիգրան Աբրահամյանը։
«Առաջին կետը Գորիս-Կապան-Ճակատեն ճանապարհահատվածն է, որի մի մասը Ադրբեջանի վերահսկողության տակ է, երկրորդը՝ Սոթք-Խոզնավար հատվածը, որտեղ ՀՀ տարածքում են ադրբեջանական զորքերը, վերահսկում են ճանապարհներ ու ջրային պաշարներ, եւ երրորդ կետը դարձել է Երասխը, որը կարեւոր հանգույց է Սյունիքին եւ Վայոց ձորին կապվելու համար։ Այդ հատվածում հնարավոր ցանկացած դիրքային բարելավումն Ադրբեջանի կողմից մեր համար կարող է անդառնալի լինել։ Ադրբեջանը երկու խնդիր է լուծում՝ ճնշումներով բանակցային գործընթացում առավելագույն զիջումներ կորզել, եւ երկրորդ, սա գործընթաց է, որը ցանկության դեպքում եւ ստեղծված բարենպաստ պայմաններում Ադրբեջանին կարող է հնարավորություն տալ լայնամասշտաբ գործողություններ իրականացնելու եւ արդյունավետ մարտ վարելու համար»,-նշեց Տիգրան Աբրահամյանը։
Նա շեշտեց․ «Այս պահին այդքան էլ հակված չեմ այն մոտեցմանը, որ սա կարող է վերածել լայնամասշտաբ ռազմական գործողությունների՝ անկախ այն հանգամանքից, որ Ադրբեջանը տարածքային հավակնություններ է ներկայացնում։ Կարծում եմ՝ այս փուլում գոնե կարճաժամկետ կտրվածքով Ադրբեջանը չի գնա լայնածավալ ռազմական գործողությունների, բայց դա չի բացառում սահմանին տեղային բախումները»։
Կարդացեք նաև
Լուիզա ՍՈՒՔԻԱՍՅԱՆ
