«Չեմ կարող գնահատել՝ ՍԴ որոշումն ամբողջությամբ իրավաչա՞փ է, թե ոչ, բայց ընտրությունները մեծ հաշվով ընթացել են ժողովրդավարական սկզբունքներին համապատասխան»,-լրագրողների հետ ճեպազրույցում այսօր ասաց «Ինքնիշխան Հայաստան» կուսակցության ղեկավար, պետական վերահսկողական ծառայության նախկին պետ Դավիթ Սանասարյանը՝ մեկնաբանելով սահմանադրական դատարանի որոշումը։
Հիշեցնենք, որ ՍԴ-ն, քննելով «Հայաստան» եւ «Պատիվ ունեմ» դաշինքների, «Զարթոնք» եւ «Հայոց հայրենիք» կուսակցությունների՝ հունիսի քսանի ընտրությունների արդյունքները վիճարկող դիմումները, որոշեց ընտրությունների արդյունքների վերաբերյալ ԿԸՀ-ի որոշումը թողնել ուժի մեջ։
Դավիթ Սանասարյանը շեշտեց․ «Բնականաբար, խախտումներ շատ են եղել։ Եղել է անգամ իրավիճակ, որ մեր կուսակցության մեծ թվով ձայներ չեն գրանցվել, հետո վերահաշվարկի արդյունքում գրանցվել են։ Բայց մեծ հաշվով ժողովրդի կամքն արտահայտված է։ Սահմանադրական դատարանի, միջազգային կառույցների կողմից այդ արդյունքներն արդեն իսկ ճանաչված են որպես եղելություն։ Ընտրված ԱԺ ունենք։ Ցավոք, չեմ կարծում, որ այդ ազգային ժողովն ամբողջությամբ սպասարկելու է ժողովրդի շահը, որովհետեւ դրանում հայտնվել են ուժեր, որոնք չպետք է լինեին այդտեղ։ Բայց իշխանությունների կամքի բացակայության հետեւանքով չեղան այնպիսի փոփոխություններ, որոնց շնորհիվ կվերահսկվեին ֆինանսական հոսքերը, թե ինչքան եւ ինչպես են գումար ծախսում։ Չեղավ առհասարակ բավարար չափով վերահսկողություն։ Չեղան այն դատավարությունները, որոնց արդյունքում հիմա ԱԺ-ում հայտնված շատ գործիչներ կլինեին համապատասխան ՔԿՀ-ներում։ Սա է վիճակը։ Ժողովուրդը նախկին-ներկա պայքարում չընտրեց նախընտրական ծրագրերը, անցած ճանապարհը։ Ընտրեց այն, ինչ ընտրեց»,-նշեց Դավիթ Սանասարյանը։
Լուիզա ՍՈՒՔԻԱՍՅԱՆ
