«Հայաստանում միայն քաղծառայողների թիվը 208 հազար է: Եթե նրանց գումարենք բանակը, ոստիկանությունը, հատուկ ծառայությունները և տեղական ինքնակառավարման մարմինները՝ կստացվի մոտ 300 հազար մարդ: Իսկ նրանց ընտանիքների անդամների հետ միասին այդ թիվը կկազմի 500-600 հազար: Փաշինյանի կուսակցության օգտին քվեարկել է 688,761 ընտրող (գրեթե 54%-ը): Գործող իշխանություններին հաջողվել է վերարտադրվել վարչական ռեսուրսի օգտագործման միջոցով», -այսօր «Ինտեգրացիա և զարգացում» հասարակական կազմակերպության եւ Եվրասիական փորձագիտական ակումբի կազմակերպած «Հետընտրական Հայաստան. իրողություններ և ակնկալիք». ուղեղային գրոհի համար, համաժողովի ժամանակ ասաց սոցիոլոգ Գեւորգ Պողոսյանը:
Ըստ սոցիոլոգի, եթե այս ընտրությունները անցկացներ ոչ թե ՔՊ-ն՝ վարչապետի պաշտոնակատարի գլխավորությամբ, այլ հատուկ ձևավորված չեզոք, ժամանակավոր կառավարությունը, ապա ընտրության արդյունքները այլ կլինեին:
Հունիսի 20-ին Նիկոլ Փաշինյանի ՔՊ-ն Երեւանում ստացել է ձայների 41 տոկոսը, մարզերում՝ ավելի շատ. «Շրջաններում և գյուղերում ընտրողները սովորաբար վատ են տեղեկացված, զրկված են այլընտրանքային հեռուստաալիքներ դիտելու հնարավորությունից և ընդհանուր առմամբ կախված են տեղական իշխանություններից»:
Միաժամանակ, Գեւորգ Պողոսյանը նկատում է, որ 15 տարվա մեջ առաջին անգամ խորհրդարանում ունենք քաղաքական ուժերի նոր դասավորություն-բաժանում. «Մեր հասարակությունը հասավ նրան, ինչին ձգտում էր. խորհրդարանում ձևավորվեց ուժեղ ընդդիմություն: Այսպիսի ընդդիմության հետ այդքան հեշտ չի լինի պայմանավորվել, որքան «Լուսավոր Հայաստանի» և ԲՀԿ-ի հետ էր: Ընդհակառակը, արդյունավետ և արգասաբեր աշխատանքի համար հայկական խորհրդարանին պետք է ուժեղ, փորձառու և իրական ընդդիմություն»:
Նելլի ԳՐԻԳՈՐՅԱՆ
