Ինչպես ավելի վաղ հայտնել էինք, «Այլընտրանքային նախագծեր խումբ» հասարակական նախաձեռնության անդամ, «Հայաստան» դաշինքի անդամ, 2020թ․-ի պատերազմում որդուն կորցրած Գեղամ Նազարյանն այսօր բերման էր ենթարկվել։
Ոստիկանական բաժնից դուրս գալուց հետո նա շտապել էր նախաձեռնության կազմակերպած միջոցառմանը, որի ժամանակ էլ պատմեց մանրամասները։ Հայտնեց, որ երբ միջոցառմանը մասնակցելու նպատակով եկել է, իջել մեքենայից, տեսել է, թե ինչպես են երեք կարմիր բերետավորներ կոպիտ հրելով՝ բերման ենթարկում մի աղջկա․ «Հեգնաբար ասացի՝ ճիշտ եք անում, ավելի ամուր սեղմեք, որովհետեւ ես էլ եմ կարծում, որ Իլհամ Ալիեւը հենց ինքն է։ Շարունակեցին իրենց գործը, հետո վազեցին իմ հետեւից։ Մեկն ասում էր՝ «Նենց արեք, որ գլուխը խփեք գետնին»․․․ Չորս հոգով չէին կարողանում ինձ շարժել, հետո 15-20 հոգի դարձան, եւ ես հասկանալով, որ հեսա ձեռքս կկոտրեն, ինքս ինձ գցեցի գետնին, որ դա չլինի այդ անասունների պատճառով։ Հետո տարան բաժին»։
Գեղամ Նազարյանի խոսքով՝ կարմիր բերետավորները ստել են, թե ինքն ինչ-որ ակցիայի է մասնակցել, թե չի ենթարկվել իրենց օրինական պահանջին։ «Իրենք իրենց են այդպես պառկեցնում գետնին, ոչ թե ինձ։ Քանի դեռ Նիկոլի վարչախումբը պահում է երկիրն իր ձեռքում, նման երեւույթներ են լինելու։ Մի ամբողջ երկիր են ասֆալտին պառկեցրել, հազարավոր մարդկանց սպանել»,-հավելեց Գեղամ Նազարյանը։
Կարդացեք նաև
Լուիզա ՍՈՒՔԻԱՍՅԱՆ
