«Աշխարհաքաղաքական նոր մարտահրավերներով լեցուն այսօրվա ժամանակահատվածում Սյունիքը թուրք-ադրբեջանական ծրագրերի ճանապարհային քարտեզում առաջին հանգրվանն է։ Ամեն ինչ անում են, որպեսզի սյունեցիներին ազդակ հղեն՝ եթե ձեր ընտրած մարդկանց ենք այսպես անում, ապա դուք ո՞վ եղաք, որ ձեզ էլ չանենք»,- «Այլընտրանքային նախագծեր խումբ» հասարակական նախաձեռնության կազմակերպած՝ «Հայաստանի քաղաքական եւ իրավական մարտահրավերները» թեմայով քննարկման ժամանակ այսօր հայտարարեց ՀՀ առաջին օմբուդսման, իրավապաշտպան Լարիսա Ալավերդյանը՝ անդրադառնալով Սյունիքի համայնքապետերի ձերբակալություններին ու կալանավորումներին։
Լարիսա Ալավերդյանի խոսքով՝ այս գործողությունների մասին մարդու իրավունքների պաշտպանության ոլորտի անձինք լռում են․ «Քաղաքացիական հասարակությունն ապացուցեց, որ ծառայում է ոչ թե հանրային շահերին, այլ ամենապղտոր գլոբալիստական կենտրոններին։ Մարդու իրավունքներն այստեղ եւս մնում են ամեն ինչից դուրս»։
Լարիսա Ալավերդյանը շեշտեց, որ Սյունիքի համայնքապետերը զենքով դիմադրել են թուրք-ադրբեջանական ցեղասպանական ագրեսիային, այլեւ այս իշխանությունների քաղաքականությանն են դեմ եղել․ «Ստացվում է, որ եթե իշխանության տեսակետից լավ մարդ ես, ուրեմն պուպուշ ես, եթե ոչ, ուրեմն՝ մուրճ։ Հիմա պատկերացրեք, որ ավելի ճաշակով ժապավեններով մի նախշուն մուրճով Մակրոնը որեւէ տեղում կես կատակով խոսի ու անցնի։ Ի՞նչ եք կարծում, միջազգային հանրությունը դրանից հետո նրան մի ժամ կթողնի՞ մնալ Ֆրանսիայի նախագահ․․․ոչ։ Հույսներդ մի դրեք միջազգային հանրության անաչառության վրա, երբ խոսքը գնում է մեր նման երկրներում մարդու իրավունքների պաշտպանության մասին։ Նրանք մեզ զարգացող երկիր չեն համարում, այլ թերզարգացած, չզարգացող»։
Կարդացեք նաև
Լուիզա ՍՈՒՔԻԱՍՅԱՆ
