Տաթեւիկ Անտոնյանը հետազոտող գիտնական է, ով շուրջ 5 տարի աշխատում է Մոլեկուլային բժշկության ինստիտուտում (Institute for Molecular Medicine): Չնայած նրան, որ Մոլեկուլային բժշկության ինստիտուտը փոքր, շահույթ չհետապնդող գիտական կազմակերպություն է ԱՄՆ-ի Կալիֆոռնիա նահանգում, այնուամենայնիվ, կազմակերպության աշխատանքը գրավել է Միացյալ Նահանգների Առողջապահության ազգային ինստիտուտի ուշադրությունը (National Institutes of Health), որը եղել է ֆինանսավորման զգալի աղբյուր վերջինիս համար: Ինստիտուտը մրցանակներ է ստացել նաեւ Ալցհեյմերի ասոցիացիայի եւ Սյուզան Կոմենի հիմնադրամի կողմից:
Մենք խոսեցինք Տաթեւիկի հետ նրա ներկայիս հետազոտությունների, ինչպես նաեւ ունկնդրեցինք երիտասարդ գիտնականներին տված նրա խորհուրդները:
– Տաթեւիկ, խնդրում ենք մի փոքր պատմեք ձեր ընթացիկ աշխատանքի մասին:
– Ես հետազոտող գիտնական եմ Մոլեկուլային բժշկության ինստիտուտում, ԱՄՆ-ի Կալիֆոռնիա նահանգում, աշխատում եմ NIH-ի կողմից ֆինանսավորվող նախագծի վրա, որը կենտրոնացած է Sars-Cov2 վիրուսի դեմ B-բջիջների էպտոպների վրա հիմնված պատվաստանյութերի զարգացման վրա: Բացի այդ, ես ակտիվորեն ներգրավված եմ AAV-PHP.eB հիմնված վիրուսների (Caltech- ից) զարգացման պրոցեսում, որոնք սինթեզում են հակա-Ab կամ հակա-տաու հակամարմիններ, ինչը նոր հակամարմինների վրա հիմնված բուժում է Ալցհեյմերի հիվանդության եւ տարբեր տաոպաթիաների համար, որոնք հատուկ մշակված են՝ անցնել մարդու արյուն- ուղեղային պատնեշը:
– Ո՞րն է ձեր ներկայիս հետազոտության հիմնական նպատակը:
– COVID-19- ի հարուցիչը SARS-CoV-2 վիրուսն է, որը ծայրահեղ հրատապ խնդիր է ներկայումս: Կորոնավիրուսը հիմնականում ախտահարում է ստորին շնչուղիները: Մահվան բարձր մակարդակը կապված է տարբեր նախատրամադրող հիվանդությունների առկայության եւ տարեցների մոտ իմունիտետի ընկճման ֆենոմենի հետ: Այդ իսկ պատճառով տարեցների համար արդյունավետ կանխարգելիչ SARS-CoV2 պատվաստանյութ ստեղծելու համար մենք առաջարկում ենք օգտագործել մեր նոր՝ ունիվերսալ MultiTEP պլատֆորմի պատվաստանյութի տեխնոլոգիան, որը մշակվել է մեր խմբի կողմից Ալցհեյմերի հիվանդության կանխարգելման համար: SARS-CoV2 պատվաստանյութը, որը հիմնված է այս տեխնոլոգիայի վրա, կբարձրացնի հակավիրուսային հակամարմինների արտադրությունը ոչ միայն չտարբերակված Th0 բջիջների ակտիվացման միջոցով, այլ նաեւ հիշողության Th բջիջների ակտիվացման միջոցով, որոնք հատկապես օգտակար կլինեն տարեց հիվանդների դեպքում:
– Ի՞նչն է ձեր աշխատանքային ոլորտի մեջ ձեզ ամենից շատ գրավում:
– Նպաստելը բժշկության ոլորտում շրջադարձային աշխատանքներին եւ կարողանալ օգնել մարդկանց առողջության եւ բարեկեցության պահպանման հարցում: Ես միշտ փնտրում եւ սովորում եմ նոր եւ ավելի լավ մոտեցումներ եւ տեխնոլոգիաներ, որոնք օգնում են ինձ ավելի լավ կատարել առաջադրած աշխատանքը:
– Ի՞նչ խորհուրդ կտաք երիտասարդ գիտնականներին, որոնք հենց նոր են սկսել իրենց կարիերան:
– Պատրաստ եղեք սովորելու յուրաքանչյուրից, ով կարող է ձեզ խորհուրդ եւ գիտելիք տրամադրել: Թիմային աշխատանքը եւ համագործակցությունը միշտ եղել են ու կլինեն հաջողության հասնելու գրավականը:
Հարցազրույցը՝ Մարիամ ՂԱԶԱՐՅԱՆԻ
«Առավոտ» օրաթերթ
15.07.2021
