«Հայաստանի դեմոկրատական» կուսակցության նախագահ Արամ Սարգսյանը այսօր հանդես եկավ խիստ մտահոգող հայտարարությամբ, որն ուղղված է Հայաստանի ԱԱԾ-ին:
«Ես այսօր հատուկ հայտարարությունով դիմում եմ ԱԱԾ-ին: Իրականում բոլոր հավաստի տվյալներն ունեմ, որ Թուրքիան եւ Ադրբեջանը Շուշիի դեկլարացիան մշակելուց հետո գործի անցան եւ հրավիրեցին մասնագետների՝ պատմաբանների, սոցիոլոգների, հոգեբանների, տնտեսագետների: Նրանք մշակել են մի ծրագիր, որը կազմված է երկու փուլից:
Առաջին փուլում նրանք ծրագրել են տնտեսական էքսպանսիայի ենթարկել Հայաստանի տնտեսությունը, ինչի շնորհիվ իրենք կիշխեն մեր ամբողջ տնտեսական համակարգում: Դա շատ հեշտ է անել, որովհետեւ Հայաստանի այսօրվա տնտեսությունը, եթե մեղմ ասեմ, տկար վիճակում է, կառավարման մակարդակը ցածրագույն է: Իսկ հոգեբաններին ներգրավել են, որպեսզի պարզեն հայ ժողովրդի այն հատվածին, որը հակված է ապրել այսօրվա օրով, հակված է տունուտեղը վաճառել, որը կարող է ընդունել նաեւ թուրքի աշխատավարձը եւ պատրաստ է նրա հետ համագործակցել: Իսկ այդպիսիների թվում կան նաեւ գործարարներ, որոնց համար միեւնույն է՝ ում հետ են գործարք կատարելու: Եվ այս ամենը հաշվի առնելով՝ ծրագիրն արդեն մշակված է: Այն կսկսվի տնտեսական էքսպանսիայից հետո ճանապարհները բացելու պահին, երբ որ այսօրվա իշխանության ղեկավարը կստորագրի, այսպես կոչված, խաղաղության մասին պայմանագիրը: Այդ պարագայում նրանք իրավունք կստանան մտնել Հայաստան հնարավոր եւ անհնար բոլոր միջոցներով: Շատ հեշտությամբ կարող են բնակֆոնդը գնել: Սա շատ լուրջ է, որի մասին ուզում եմ բացահայտ ասել՝ հաշվի առնելով, որ ժողովրդի մի հատվածը պատրաստ է ցանկացած գնով տունը վաճառել եւ հեռանալ երկրից: Նրանք կարող են այստեղ խորամանկություն անել՝ վճարելով երկու անգամ ավելի:
Ահա, այսպիսի լուրջ վտանգ է կախված մեր պետության գլխին:
Կարդացեք նաև
Ճանապարհներ բացելը, թվում է, թե լավ երեւույթ է: Բայց այդ ճանապարհները բացվում են ոչ թե մեր, այլ՝ թուրքերի եւ ադրբեջանցիների առջեւ: Ու նրանք իրականացնելու են շատ ավելի մեծ այն ծրագիրը, որ ունեն: Դա իրենց դարձնելու է աշխարհաքաղաքական եւս մի գործոն շատ արագ փոփոխվող այս միջավայրում: Եվ դա արվելու է Հայաստանի միջոցով: Այլեւս ոչինչ պետք չի լինելու պատերազմով վերցնել: Դա շատ ավելի հեշտ է լինելու ճանապարհներն անխափան օգտագործելով, առավել եւս, որ մենք դիմադրություն ցույց չենք տալիս:
Այդ ծրագրի երկրորդ փուլը հետեւյալն է: Առանց պատերազմի մի քանի տարվա ընթացքում՝ լավագույն դեպքում 4-5 տարվա, տնտեսական էքսպանսիայի ենթարկելուց հետո լինելու է նաեւ դեմոգրաֆիական փոփոխություն: Այսինքն, այստեղ կբնակվեն նաեւ եկվորները: Արդեն օրինակներ ունենք: Եվ խառը բնակչության պայմաններում շատ ավելի հեշտ է լինելու լծակները վերցնել իրենց ձեռքը:
Եթե որեւէ մեկը կասկածում է իմ այս ասածներին, կարող եմ բերել Եվրոպայի օրինակը: Գերմանիայում արդեն թուրքական ամբողջական երկրներ կան, որոնք ինքնավար են գործում: Նրանց դեմոգրաֆիական աճը բերելու է նրան, որ 2050-ականներին գերմանացի ազգն արդեն տիտուլային ազգ չի լինելու: Սրանք բացահայտ փաստեր են:
Ահա, այսպիսի լուրջ վտանգ է կախված մեր պետության գլխին»,-հայտարարեց Արամ Սարգսյանը:
Աշոտ ՀԱԿՈԲՅԱՆ
