«Կարծում էի, որ զինված ու դիմակավորված ԱԱԾ-ականները պետք է Սեւ լիճ գնային, որովհետեւ այնտեղ է մեր թշնամին, բայց ոչ, ճանապարհը շփոթել, ներխուժել են կոմբինատ։ Աշխատակիցներին տեռորի են ենթարկում, ցուցմունքներ կորզում»,-խորհրդարանում լրագրողների հետ ճեպազրույցում այսօր անդրադառնալով Զանգեզուրի պղնձամոլիբդենային կոմբինատում կատարված խուզարկություններին՝ ասաց «Իմ քայլից» դուրս եկած պատգամավոր, «Հայաստան» դաշինքի անդամ Աննա Գրիգորյանը։
«Աշխատակիցներն ահ ու սարսափով են այնտեղ գտնվում։ Սա հակապետական քայլ է։ Նման քայլից հետո ո՞ր տնտեսվարողն ու ներդրողը կուզենա ներդրում անել ՀՀ-ում։ Բերման են ենթարկում աշխատակիցներին, որոնք քաղաքական կողմնորոշում ունեն եւ ընդդիմությանն են սատարել»,-նշեց Աննա Գրիգորյանը։
Ինչ վերաբերում է ԱԺ արտահերթ նիստում այսօր էկոնոմիկայի նախարարի պաշտոնակատար Վահան Քերոբյանի զեկուցած օրինագծին, որը նաեւ կոմբինատին է առնչվում, Աննա Գրիգորյանը շեշտեց․ «Ասում են, թե հանքարդյունաբերողներից փողը վերցնեն, տան ժողովրդին։ Բայց մեկ այլ նախագծով՝ իրենց տրվելիք գումարի չափն են բարձրացնում։ Ասում են, թե հիսուն հազար դրամը բավարար չէ պատգամավորի համար։ Իսկ թոշակառուին երեսուն հազար դրամը բավարա՞ր է։ Նախարար դարձած գործարարն ի՞նչ է կարծում, սա լա՞վ ազդակ է միջազգային ներդրողներին»։
Կարդացեք նաև
Հիշեցնենք, որ պատգամավորների ծախսերին հատկացվող գումարը 50 000 դրամից 250 000 դրամ դարձնելու վերաբերյալ իշխանության հեղինակած նախագիծն այսօր եւս քննարկվել է ԱԺ արտահերթ նիստում։
Աննա Գրիգորյանը նաեւ շեշտեց՝ թշնամի երկրի ղեկավար Ալիեւը ՀՀ-ի հանդեպ տարածքային հավակնությունների մասին է խոսում, սպառնում, իսկ զուգահեռ՝ ՀՀ-ում Սյունիքի համայնքապետերին են ձերբակալում, իշխանության պողպատյա մանդատակիրներին Ալիեւի ասածները չեն հետաքրքրում, եւ այս ամենը՝ միաժամանակ։ «Համայնքները գլխատում են, որ իրենց կամակատարներին բերեն Սյունիքում»,-հավելեց Գրիգորյանը։
Լուիզա ՍՈՒՔԻԱՍՅԱՆ
