«Պետք է արձանագրել, որ ԱԺ են մտնում երկու ընդդիմադիր ուժեր, որոնցից մեկի ղեկավարը հոկտեմբերի 27-ի ժամանակ ՀՀ ղեկավարն էր, իսկ մյուսի ղեկավարը՝ ԱԱԾ պետը։ Դուք այստեղ խնդիր չեք տեսնո՞ւմ։ Ակնարկում եմ, որ պետական պահպանությունն ավելի հստակ պետք է իրականացնի իր գործունեությունը, որպեսզի ԱԺ-ում թնդանոթներ չհայտնվեն․․․իհարկե, կա վտանգ»,-խորհրդարանում լրագրողների հետ ճեպազրույցում այսօր անդրադառնալով այն հանգամանքին, որ կառավարության որոշմամբ՝ պետական պահպանության ծառայությանը 113 միլիոն դրամ կտրամադրվի՝ պետական պահպանության ծախսերի իրագործման համար, ասաց «Իմ քայլի» պատգամավոր Հովիկ Աղազարյանը։
Հարցին ի պատասխան, թե ինչի մասին է ակնարկում, նա կրկնեց․ «Պարզ հայերենով եւ ինձ ոչ հատուկ դանդաղությամբ կրկնեմ՝ նրանցից մեկի ժամանակ հոկտեմբերի 27 է եղել, մյուսը ԱԱԾ նախարար էր։ Կարծում եք, որ Ռոբերտ Քոչարյանն ու Սերժ Սարգսյանն այստեղ են գալիս օրենսդրական աշխատանքի համա՞ր։ Ոչ, գալիս են իշխանություն տապալելու, որպեսզի իրենց հետ կապված գործերը լղոզվեն»։
Հարցին՝ «կարծում եք, խորհրդարան են գալիս, որ պատգամավորական անձեռնմխելիությունից օգտվե՞ն», Հովիկ Աղազարյանը պատասխանեց․ «Անձեռնմխելիության հարց չկա, որովհետեւ մենք ցանկացած պահի կարող ենք ցանկացած մեկին դատախազի միջնորդությամբ զրկել անձեռնմխելիությունից։ Մենք ունենք այդ մեծամասնությունը»։
Կարդացեք նաև
Մեր հարցադրմանն ի պատասխան՝ «քաղաքական մեծամասնությամբ անձին անձեռնմխելիությունից զրկելն իրավակա՞ն որոշում է, թե քաղաքական», Հովիկ Աղազարյանը շեշտեց․ «Դե, ԱԺ-ում ցանկացած որոշում էլ քաղաքական է։ Բայց կարեւոր է, թե որն է հիմքը։ Երբ դատախազը դիմում է անձեռնմխելիությունից զրկելու համար, դա չի նշանակում, որ այդ մարդուն ձերբակալելու են։ Դա նշանակում է թույլտվություն, որպեսզի պատգամավորի հանդեպ իրավական գործընթաց սկսվի»։
Լուիզա ՍՈՒՔԻԱՍՅԱՆ
