ԱԺ պատգամավոր Նաիրա Զոհրաբյանը կարծում է, որ այսօրվա իրավիճակում պատգամավորների ծախսերին հատկացվող գումարը 50 000 դրամից 250 000 դրամ դարձնելու վերաբերյալ իշխանության հեղինակած նախագիծն անբարոյականություն է։ «Այո, պատգամավորները պետք է ստանան արժանապատիվ աշխատավարձ, բայց հիմա դրա ժամանակը չէ, հիմա ավելի կենսական խնդիրներ ունենք։ Նախագիծը զավեշտալի հիմնավորում ունի, թե ընտրողների հետ հանդիպելու համար են գումարի չափը բարձրացնում։ Ինձ քաղաքացու հետ հանդիպելու համար երբեւէ լրավճար պետք չի եղել։ Պատգամավորը պարտավոր է հանդիպել ընտրողների հետ, եւ դրա համար պատգամավորներն աշխատավարձ են ստանում»,-խորհրդարանում լրագրողների հետ ճեպազրույցում այսօր ասաց Նաիրա Զոհրաբյանը։
Նա առաջարկում է այդ գումարներն ուղղել վիրավոր զինվորների բուժմանը, որն արտերկրում է հնարավոր կազմակերպել․ «Բզկտված Հայաստանն ու Արցախն այնքան խնդիրներն ունեն, որ պատգամավորի լրավճարն ավելացնելն անբարոյականություն է։ Ինչ-որ պահի, երբ տնտեսությունը կլինի կայուն, իսկ խնդիրները՝ լուծված, այո, պետք է անդրադառնալ նաեւ պաշտոնյաների աշխատավարձերին»։
Նաիրա Զոհրաբյանը համոզված է՝ այս նախագիծը նրա համար է, որպեսզի իշխանությունը խուսափի «պարգեւավճար» զգայուն բառն օգտագործելուց։
Կարդացեք նաև
Լուիզա ՍՈՒՔԻԱՍՅԱՆ
