Այսօր վաղ առավոտից Շիրակի մարզպետարանի աշխատակիցները պատվաստվելու հերթ էին կանգնել։ Պատվաստումը կատարվում էր տեղում՝ մարզպետարանի դահլիճում, ուր և այցելել էին բուժաշխատակիցները։
Ինչպես պարզեցինք մարզպետարանի մի քանի աշխատակիցներից, նրանց մեջ քիչ չէին չինական պատվաստանյութ՝ «ԿորոնաՎակ» նախընտրողները։ Նրանցից մեկը կատակեց․ «Վիրուսը տարածվեց Չինաստանից, չինացիք էլ հավանաբար գիտեն վերացնելու գաղտնիքը։ Դրա համար էլ հենց չինական պատվաստանյութն ընտրեցի»։
Փաստորեն, Շիրակի մարզպետարանը դարձավ առաջին պետական կառույցը, որտեղ աշխատակիցները համատարած պատվաստվեցին։
Այսպիսով, Շիրակի մարզպետարանը օրինակ ծառայեց մյուս պետական կառույցների աշխատակիցներին՝ ևս պարտադիր պատվաստվելու։
Մարզպետարանի ֆեյսբուքյան էջում, որտեղ լուսանկարներ են տեղադրվել տարբեր պաշտոնյաների պատվաստումից, գրված է․«COVID-19-ի դեմ պատվաստման գործընթացը շարունակվում է։ Շիրակի մարզպետարանի աշխատակիցների մի մասն արդեն երկրորդ անգամ է պատվաստվում, մի մասն էլ այսօր պատվաստվեց։ Շիրակի մարզպետարանը կոչ է անում պայքարել կորոնավիրուսի դեմ՝ պատվաստվելով և պաշտպանված լինելով»։
Կարդացեք նաև
Նունե ԱՐԵՎՇԱՏՅԱՆ
Լուսանկարները՝ Շիրակի մարզպետարանի ՖԲ էջից
