Ռեփերն այդ նպատակով համերգ է ունեցել եւ դրամահավաք է սկսելու
Հուլիսի 1-ին «Մեցցո» ակումբում կայացավ մոսկվաբնակ ռեփ կատարող, հասարակական գործիչ NAY 374-ի՝ Դավիթ Աղաջանյանի, NAYMESIS խորագրով բարեգործական համերգը՝ կենդանի նվագախմբով։
Ինչպես «Առավոտի» հետ զրույցում նշեց Դավիթ Աղաջանյանը, համերգի տոմսերի վաճառքից գոյացած հասույթը կուղղվի Երեւանում Workout տիպի մեծ մարզահրապարակի կառուցմանը, որի նպատակն է Հայաստանի Հանրապետությունում զանգվածային մարմնակրթության խթանումն ու զարգացումը։
Դավիթը հույս ունի, որ իր նախաձեռնությունը վարակիչ կլինի այլոց համար նույնպես, եւ շատերը կմիացնեն իրենց ջանքերը այդ նպատակի իրականացման համար: NAY 374-ն ընդգծեց, որ համերգն արդեն մեծ հետաքրքրություն է առաջացրել ինչպես երաժշտական ու մարզաշխարհի մարդկանց, այնպես էլ հանրային գործիչների շրջանակում:
Կարդացեք նաև
Ռեփ կատարողը հավաստիացրեց, որ կառուցվելիք մարզահրապարակը մատչելի կլինի նաեւ հաշմանդամություն ունեցող անձանց համար եւ այդ առումով կլինի տեսակի մեջ առաջինը մեր երկրում:
Առայժմ համերգի տոմսերի վաճառքից հավաքվել է գումարի մի մասը, Դավիթն ասում է, որ պատրաստվում են դրամահավաք իրականացնել, բնականաբար, նաեւ այլ համերգներ կլինեն, ու լավ կլինի, եթե թեկուզ փոքր մասնաբաժնով, պետությունն էլ մասնակցի: Համերգից գոհ է, սպասելիքներն արդարացել են, առողջ ապրելակերպի ու զանգվածային սպորտի թեման շատերին է հետաքրքրել:
Համերգին ներկա են եղել ինչպես սպորտի՝ մասնավորապես ըմբշամարտի օլիմպիական հավաքականի ներկայացուցիչներ, չեմպիոն մարզիկներ, այնպես էլ շոու-բիզնեսի աստղեր, հասարակական գործիչներ, թեման էլ լայնորեն հանրայնացվել է:
Դավիթ Աղաջանյանը Մոսկվայի օրինակն է բերում. 2010թ. Մոսկվայի բոլոր բացօթյա մարզահրապարակներում տղամարդիկ հավաքվում ու գարեջուր էին խմում, գոռգոռում, իսկ 2019-2020 թվականների Մոսկվայում լրիվ այլ պատկեր էր՝ մարզահրապարակներն այլեւս անհրապույր վայրեր էին գարեջուր խմողների եւ հրապուրիչ վայրեր՝ մարզվողների համար:
«Այդ ամենը իմ աչքով տեսնելուց հետո մտածեցի, որ կարելի է նույնը անել Հայաստանում: Համերգից հետո լիքը մարդ հետաքրքրված է, արդեն սա ձնագնդիի պես մեծանալու է: Կարծում եմ՝ առաջիկա հինգ տարում այդ հարցը կլուծվի, հենց Երեւանում հունի մեջ ընկանք, կանցնենք նաեւ մարզերին: Արդեն մի քանի թաղապետերի հետ պայմանավորվածություններ ունենք, մարզահրապարակների կառուցման համար ընտրելու ենք հատկապես այնպիսի վայրեր, որտեղ ոչինչ չկա, տարիներով անմխիթար վիճակ է եղել, ու նման «չոլերի» մեջ կկառուցենք մարզահրապարակներ, կտնկենք ծառեր, կբարեկարգենք տարածքը: Պատկերացրեք, եթե առաջինը կառուցվի, ու ամեն ինչ լավ լինի, ինչքան մարդ կհավատա, որ դա հնարավոր է»,-ասաց մեր զրուցակիցը: Նա նորից շեշտեց, որ իրենց համերգի նպատակն է խթանել Հայաստանում զանգվածային մարմնակրթությունը եւ առողջ ապրելակերպը՝ կառուցելով նոր բազմաֆունցիոնալ անվճար մուտքով մարզահրապարակներ։
Հավելենք, որ համերգի ժամանակ NAY-ի հետ միասին բեմում էին Բագրատ Տերտերյանը (Dj Beatman), Արման Մնացականյանը (Drums), Էդգար Ավետիսյանը (Bass), Արեգ Օրդյանը (Guitar), Վահե Մարտիրոսյանը (Keyboard), Դավիթ Մելքոնյանը (Saxophone), Դանիել Մելքոնյանը (Trumpet)։ Համերգը վարել է Armcomedy-ի սիրված հաղորդավար Սերգեյ Սարգսյանը, որը համերգի գաղափարի առաջին օրերից դարձել է նախաձեռնող խմբի անդամ։ Իրենց երգերով հանդես են եկել Karlos Saha-ն, Միսակ Ոսկանյանը, Անդրանիկ Հարությունյանը, Armenian Beatbox Association-ի տղաներից՝ Հայկ Սնխչյանը: Էրիկ Հմայակյանն ու Ռոբերտ Հակոբյանն էլ ներկայացրել են կենդանի բիթբոքս։
Գոհար ՀԱԿՈԲՅԱՆ
Լուսանկարները՝ Արամ Կարապետյանի եւ Ինգա Ավանեսովայի
«Առավոտ» օրաթերթ
13.07.2021
