Գորիսի Քարահունջ բնակավայրի 34/12 ընտրական տեղամասում հանձնաժողովի քարտուղար Վալերիկ Մանուչարյանը հունիսի 20-ին կայացած խորհրդարանական արտահերթ ընտրություններում արձանագրված խախտման մասին օրեր առաջ դիմել է ոստիկանություն։
Մասնավորապես, «Հայաստան» դաշինքի վստահված անձ Լուսինե Ավետյանը (Քարահունջի վարչական ղեկավար, որն երկու ամսով կալանավորվել է ընտրական խախտումների մեղադրանքով.–Ա․Դ․) իր պայուսակից հանել և իր հորեղբոր որդուն` Արտիկ Ավետյանին է տվել ԿԸՀ-ի կողմից կնքված «Իրավական մշակույթի զարգացման ինստիտուտ» կազմակերպության տեղական դիտորդի վկայական։ Տիկին Ավետյանը տեղում լրացրել է բարեկամի տվյալները, որ նա կարողանա մուտք գործել ընտրատեղամաս և, ըստ հաղորդման՝ ուղղորդի ընտրողներին։ Վալերիկ Մանուչարյանը խախտման մասին տեղյակ է պահել թիվ 34 տարածքային ընտրական հանձնաժողովի նախագահ Սլավիկ Դադաշյանին, որը համապատասխան միջոցներ չի կիրառել։
Կարդացեք նաև
Aravot.am-ի հետ զրույցում Սլավիկ Դադաշյանը նշեց, որ ինքը չուներ իրավական որեւէ լծակ՝ միջոց կիրառելու։ Դադաշյանը հորդորել է «խախտումը ֆիքսել գործավարության մատյանում, որպեսզի հետո կարողանային զբաղվել, բայց չեն արել»։ «Ես հասա ընտրատեղամաս, ես վստահված անձանց կամ դիտորդի հանելու լիազորություն չունեմ։ Իմ գործառույթը այն էր, որ ընթացքը չխաթարվեր։ Բոլոր ավելորդ մարդկանց, որոնք իրավունք չունեին ընտրատեղամասում գտնվել, հանեցի դուրս, որպեսզի քվեարկությունը չընդհատվի»,–ասում է Դադաշյանը։
Տարածքային ընտրական հանձնաժողովի նախագահը կարծում է, որ տեղամասային ընտրական հանձնաժողովի խնդիրն էր հարցը կարգավորել։ «Թող իրենց մեղքը ուրիշի վրա չբարդեն, հանձնաժողովի նախահագը, քարտուղարն են պատասխանատու, եւ այսուհետ կարծում եմ, նրանք չեն ընդգրկվի հանձնաժողովներում, պիտի նույնիսկ պատասխանատվություն կրեն»,–ասում է Դադաշյանը։
Վերջինս տեսել է այդ դիտորդի վկայականը։ «Չեմ կարող ասել՝ կեղծ էր, թե կեղծ չէր։ Բայց սիրուն գրված էր։ Ասում են՝ ծնկի վրա են գրել անունը, բայց չէի ասի։ Դիտորդի վկայականները տրվում են ԿԸՀ–ի կողմից»,–ասում է Դադաշյանը։
Վալերիկ Մանուչարյանը հակադարձում է վերադասին։ «Եկել էր ընտրատեղամաս, տեսավ՝ չենք գրանցել գործավարության մատյանում, արձանագրեր մեր անգործությունը ու պահանջեր գրառում անեիք»,–ասում է Մանուչարյանը։
Նշենք, որ ոստիկանությունում փաստի առնչությամբ պարզվում են հանգամանքները։
Արմեն ԴԱՎԹՅԱՆ
Վալերիկ Մանուչարյանի լուսանկարը՝ նրա Ֆեյսբուքի էջից
