«Դիմումատուները շռայլորեն օգտագործել են «բռնության կոչ» եզրույթը, դատարանին ներկայացրել քաղաքական ուժերի առաջնորդների հայտարարությունների քրեաիրավական նշանակություն ունենալու հանգամանքը, բայց չմոռանանք՝ ամեն հարկադրանք չէ, որ բռնություն է, սա պարզ բացատրություն է»,-ՍԴ նիստում այսօր անդրադառնալով դիմումատու քաղաքական ուժերի մատնանշած հանգամանքին, որ ՔՊ առաջնորդ Նիկոլ Փաշինյանի՝ քարոզարշավի ժամանակ հնչեցրած հայտարարությունները բռնության կոչ են պարունակել, վախի մթնոլորտ սերմանել եւ ազդել ընտրողների կամարտահայտության վրա՝ ասաց դատարանում ՀՀ դատախազության ներկայացուցիչ Կարեն Բիշարյանը։
«Եթե իրավական հարկադրանքի մասին է խոսքը, ապա բռնության մասին խոսք լինել չի կարող։ Քրեաիրավական տեսանկյունից հարցին գնահատական տալիս հաշվի ենք առել կոչեր արած անձանց կարգավիճակն առանց բացառության։ Բոլոր կոչերն արվել են մասնակից քաղաքական ուժերի ղեկավարների կողմից։ Մյուս կարեւոր հանգամանքը հայտարարությունների համատեքստն է։ Գուցե դիմումատուները դիտավորյալ չեն ասում այն մասին, որ ՔՊ ղեկավար Նիկոլ Փաշինյանի կողմից հնչած արտահայտություններում կարմիր թելի նման անցել է այն գաղափարը, որ մուրճի ցուցադրումը սիմվոլ է, որը հետապնդում է օրենքի դիկտատուրա հաստատելու նպատակը։ Ակնհայտ է, որ խոսքի համատեքստը բռնությանը չի վերաբերում։ Գուցե կարող է վերաբերել հարկադրանքին, բայց ամեն հարկադրանք չէ, որ բռնություն է։ Հարկադրանքը կարող է լինել օրինական եւ իրավական»,-նշեց Կարեն Բիշարյանը։
Նրա խոսքով՝ Փաշինյանն իր ելույթներում քանիցս շեշտել է, որ մուրճի ցուցադրումը բառացի պետք չէ հասկանալ, այն օրենքի դիկտատուրայի սիմվոլ է, ուստի խոսքը պատշաճ պետք է գնահատվեր դիմումատուների կողմից։
Հիշեցնենք, որ ՍԴ-ն այսօր միասնական վարույթում շարունակում է քննել ընդդիմադիր քաղաքական ուժերի՝ «Հայաստան» եւ «Պատիվ ունեմ» դաշինքների, «Զարթոնք» եւ «Հայոց հայրենիք» կուսակցությունների՝ հունիսի քսանի ընտրությունների արդյունքները վիճարկող դիմումները:
Կարդացեք նաև
Լուիզա ՍՈՒՔԻԱՍՅԱՆ
